د کور او ښار جوړولو وزارت اداري غونډه کې پر یو شمېر مهمو موضوعاتو او فعالیتونو خبرې وشوې
۱۴۴۷/۰۳/۰۷
د کور او ښار جوړولو وزارت د محترم وزیر الحاج مولوي نجیب الله حیات حقاني په مشرۍ اداري غونډه ترسره شوه، چې په کې د وزارت محترم مالي او اداري مرستیال الحاج محمد ارسلاح خروټي، د ښاري چارو محترم مرستیال شیخ مدار علي کریمي بامیاني، د مسکن، ودانیزو چارو او برنامو د پراختیا محترم مرستیال مولوي ګل زرین صابر، د وزارت محترمو رئیسانو، امرینو او استازو ګډون درلود.
په غونډه کې د تېرو دوو میاشتو لاسته راوړنې او کړنې و ارزول شوې، او د کابل نوي ښار د ماسټر پلان، ساختاري او پراختیايي پلان د تطبیق پر موضوعاتو بحث وشو.
په نوي کابل ښار کې د کابل ـــــ بګرام عمومي سړک د ډیزاین او براورد، د ماسټر پلان مطابق د پروژو عملي کېدا، د املاکو تصفیې، د هېواد په کچه د ښاري پلانونو جوړولو او د منظور شوو پلانونو په ځانګړې توګه د ستراتېژیکو پلانونو د خپرولو په اړه هم بشپړې خبرې وشوې.
د کور او ښار جوړولو محترم وزیر الحاج مولوي نجیب الله حیات حقاني، په خپلو خبرو کې د کارونو پر چټکتیا ټینګار وکړ، زیاته یې کړه، درسپارل شوي مسؤلیتونه د الله ج د رضا لپاره ترسره کړئ، ودانیزو پروژو ته چټکتیا ورکړئ، ځکه په خبره یې افغانستان تر هر څه ډېر سرپناه ته اړتیا لري.
دغه راز، په غونډه کې ټینګار وشو چې د غیر اختیاري بودجې اړوند د ساختماني نقشو جوړولو ته به لومړیتوب ورکول کېږي، پروژې به پر خپل وخت عملي کېږي او کارونه به د ځنډ پرته ترسره کېږي.
په غونډه کې ګډونوالو هر یو خپل فکر شریک کړ او د چارو د لا ښه پرمختګ په موخه یې د خپلو ریاستونو او کاري استقامت برخه کې لازم وړاندیزونه وکړل.
د کور او ښار جوړولو وزارت د هېواد په کچه د ښارونو د منظم پلان جوړولو، د ملي پروژو د پلي کولو او د ښاري خدمتونو د برابرولو لپاره پر بنسټیزو پروګرامونو کار کوي اود رهبرۍ دغسې ناستې د وزارت د کړنو د همغږۍ، شفافیت او د ملي پروژو د مؤثر تطبیق لپاره مهم ګام ګڼل کېږي.
