د بدخشان ولایت د بهرنیو چارو ریاست د اداري ودانۍ د پاتې چارو پروژه بریالۍ بشپړه شوه
۱۴۴۶/۱۱/۱۷
بدخشان کې د کور او ښار جوړولو ریاست محترم رئیس مولوي ولي الله الهي وایي، په دغه ولایت کې د بهرنیو چارو ریاست د اداري ودانۍ پاتې چارې د ټولو تخنیکي او ساختماني پړاونو تر بشپړولو وروسته په بریالیتوب سره پای ته رسېدلې او د ګټې اخیستنې لپاره چمتو شوه.
ښاغلی مولوي الهي وایي، یاده پروژه چې ۴،۱۱۲،۳۱۱ افغانۍ یې مجموعي قرارداد شوی، د ۱۴۰۳ کال د قوس په ۲۳مه نېټه پیل او د ۱۴۰۴ کال د ثور تر ۲۰مې نېټې پورې بشپړه شوه.
نوموړی وایي، دغه درې پوړیزې ودانۍ مهم کارونه لکه د المونیمي کړکیو او دروازو نصب، د اوبو رسولو او کانالیزاسیون سیستمونه، د برېښنا سیستم او اړوند تجهیزات، د تشنابونو او پخلنځي کاشي او سرامیک، داخلي رنګمالۍ، د احاطې دیوالونو رنګمالۍ، شنه ساحه، نیالګي کرل، او نور اړین ساختماني کارونه د معیار مطابق بشپړ شوي دي.
یاده پروژه د بدخشان ولایت د اداري زیربناوو د پیاوړتیا په موخه یو مهم ګام ګڼل کېږي، او تمه ده چې له هغې څخه د ګټې اخیستنې له لارې به د دې ولایت د دیپلوماټیکو او اداري خدماتو د لا ښه والي لپاره زمینه برابره شي.
