محترم محمد جواد پیکار: دولتي ځمکو بانک پر اړمنو باندې د ځمکو وېش ته لار پرانیستې ده
د ښار جوړولو او ځمکو سرپرست وزیر محترم محمد جواد پیکار په خپل کارځای کې د یو ان هبیتات له خوا د شورا برنامې تخنیکي سلاکار او مسئول محترم ډومېنېک ملېرو ډېوېډ سره لیدنه کې د دولتي ځمکو بانک، کابل کې اړمنو باندې د جوړ شوي ښارګوټي او د غیررسمي ښاري سیمو ثبت برنامې پرمختګونه ارزونه وکړه.
په لومړي سر کې د شورا برنامې مسئول د ډنمارک هېواد په مالي مرسته د دولتي ځمکو بانک د لاس ته راوړنو رپوټ وړاندې او زیاته یې کړه چې دغه لړۍ تر دې دمه په پوره بریالیتوب سره پلي شوې ده.
ورپسې د ښار جوړولو او ځمکو سرپرست وزیر وویل، د دولتي ځمکو بانک یوه ملي برنامه ده او د دې برنامې له لارې تر دې دمه څه باندې ۵ مېلیونه او ۲۰۰ زره جریبه دولتي ځمکې سروې او په سیسټم کې ثبت شوي دي.
محترم محمد جواد پیکار د دغې برنامې مثبتو اغېزو په اړه زیاته کړه چې په سیسټم کې د ټولو ځمکو سروې او ثبت پر اړمنو په ځانګړې توګه راستېندونکو کډوالو او کورنیو بې ځایه شویو باندې د ځمکو وېش په برخه کې خورا اغېزناک ثابت شوی دی او د دغې لړۍ دوام د سولې ټینګښت سره هم ډېره مرسته کولای شي.
وروسته بیا د شورا برنامې مسئول یاده کړه چې د ښار جوړولو او ځمکو وزارت په اساسي ونډه، راستنېدونکو هېوادوالو او کورنیو بې ځایه شویو لپاره د کابل په شکردرې ولسوالۍ کې د التفات په نوم د ښارګوټي ماسټر پلان چمتو شوی، خو اړتیا ده چې سیمه کې ټولنیزه ستونزه هواره شي.
د ښار جوړولو او ځمکو سرپرست وزیر وویل، دغه ښارګوټی په ټوله کې ۶۶۹۲ استوګنیزې نومرې لري او اړمنو لپاره یو ښه زېری دی. نوموړي څرګنده کړه چې ښار جوړولو او ځمکو وزارت راولاړه شوې ستونزه د کابل ولایت مقام او ځايي اوسېدونکو سره د خبرو اترو له لارې هواروي.
محترم محمد جواد پیکار د غیررسمي ښاري سیمو ثبت پروګرام په اړه هم وویل، یاده برنامه په پوره بریالیتوب سره په اتو ښارونو کې د پلي کېدو په حال کې ده.
نوموړي همدا راز اړوندو برخو ته لارښوونه وکړه چې د غیر رسمي سیمو پر ملکیتونو باندې د ملکیت سند وېش څخه وار د مخه د سیمې بهسازۍ او بیارغونې پلان وروستی کړي، څو ملکیت سند ورکړې سره هم مهاله د سیمې د بیا رغونې چارې هم پیل شي.
