محترم محمد جواد پيکار د فضا ملي ستراتيژۍ او پلان پروژه (NSSP) منظور کړه

د ښار جوړولو او ځمکو وزارت سرپرست محترم محمد جواد پيکار په افغانستان کې د ښاري پراختيا په چارو کې د نړيوال بانک استازي محترم هيونګ وانګ سره د فضا ملي ستراتيژۍ او پلان پروژې د پيل پر څرنګوالي او تمويل په اړه خبرې وکړې.

په پيل کې د ښاري پراختيا په چارو کې د نړيوال بانک استازي په ښاري چارو او ځمکوالۍ برخه کې د ښار جوړولو او ځمکو وزارت د رهبرۍ لاسته راوړنې بې سارې يادې کړې او بيا يې د يادې پروژې په اړه وضاحت ورکړ.

محترم هيونګ يانګ وويل؛ ټاکل شوې دا پروګرام د شمالي کوريا د يو اعشاريه پنځه ميليونه ډالرو په مرسته د نړيوال بانک له‌خوا د ښار جوړولو او ځمکو وزارت تر رهبرۍ لاندې چې ماليي، اقتصاد، ترانسپورټ، کار او ټولنيزو چارو، سوداګرۍ او صنايعو، کرنې اوبو لګولو او مالدارۍ او کورنيو چارو وزارتونه هم په کې ګډون لري، پلی کيږي.

ورپسې محترم محمد جواد پيکار د ښار جوړولو او ځمکو وزارت په چوکاټ کې د پراختيايي پروژو د پلي کولو په برخه کې د نړيوال بانک له مالي او تخنيکي ملاتړ څخه په مننې وويل؛ د فضا ملي ستراتيژۍ او پلان پروژې په پلي کېدو سره به د ملي او بين المللي پروژو د تطبيق په برخه کې د وزارتونو تر منځ همغږي پراخه او په دې برخه کې به اسانتياوې رامنځته شي.

د ښار جوړولو او ځمکو وزارت زياته کړه چې دې پروژې سره به د اوبو سرچينې، ځنګلونه، شنې سيمې، سوداګريز بندرونه او د واورو ذخيرې د هوا له لارې نقشه کيږي او له مخې به يې وزارتونه خپلې برنامې پلانوي.

محترم محمد جواد پيکار د دې پراختيايي پروژې پر اهميت، اغېز او منظورۍ د ټينګار تر څنګ لارښوونه وکړه چې د يادې پروژې د تطبيق او پرمخ‌وړلو لپاره دې ژر تر ژره د اړوندو متخصصينو په ګډون کاري واحدونه رامنځته شي. 

د يادولو ده چې د فضا ملي ستراتيژۍ او پلان پروژه د شمالي کوريا او نړيوال بانک په مالي او تخنيکي مرسته د ښار جوړولو او ځمکو وزارت له‌خوا پلې کيږي.