د هرات ولایت د یوه جامع جومات له ودانیزو چارو څخه تخنیکي څارنه ترسره شوه
۱۴۴۸/۱/۲۳
د هرات ولایت د کور او ښار جوړولو ریاست انجینري ټیم د ګذرې ولسوالۍ اړوند د عامه امنیت د پنځم کنډک د جامع جومات له ودانیزو چارو څخه تخنیکي څارنه ترسره کړه.
د تخنیکي څارنې پر مهال د جومات د رنګولو، بهرنۍ ډبره کارۍ، د پلې لارو د کانکرېټ اچولو او نورو روانو ودانیزو چارو کیفیت وارزول شو.
همدارنګه، قراردادي شرکت ته لازمې تخنیکي سپارښتنې وشوې، څو ټولې چارې د منظور شوې طرحې، قرارداد او تخنیکي مشخصاتو سره سم او د ملي معیارونو له مخې ترسره شي.
د څارنې په ترڅ کې د معیاري ساختماني موادو د کارونې، د رنګولو له وړاندې د سطحو د مناسب چمتووالي، د کانکرېټ د ساتنې او د ودانیزو چارو د کیفیت د تضمین په اړه هم اړینې تخنیکي لارښوونې وړاندې شوې.
د هرات ولایت د کور او ښار جوړولو ریاست د ودانیزو پروژو د کیفیت د لوړولو او د تخنیکي معیارونو د دقیق تطبیق په موخه د ورته پروژو له بهیر څخه خپلو دوامداره تخنیکي څارنو ته دوام ورکوي.
