د ترکيې له اېلکېپای ساختماني شرکت مسؤلینو سره پر ستراتیژیکو همکاریو خبرې وشوې
۱۴۴۶/۱۲/۲۰
د کور او ښار جوړولو وزارت محترم سرپرست وزیرالحاج شیخ حمدالله نعماني په خپل کاري دفتر کې، د ترکيې هېواد د اېلکېپای (ILKYPI) ساختماني شرکت له رئیس ښاغلي عبدالله شورش سره ولیدل.
ښاغلي شیخ حمدالله نعماني، د یاد شرکت مسؤلینو ته د ښه راغلاست ترڅنګ، په افغانستان کې د ساختماني چارو پر کیفیت او سټنډرډونو خبرې وکړې او د ښاري پراختیا، پانګونې او بنسټیزو ودانیزو چارو پروژو په اړه یې معلومات وړاندې کړل.
ښاغلي عبدالله شورش وویل، دوی په صنعتي تأسیساتو، مسکوني او سوداګریزو پروژو، تعلیمي او تحصیلي پروژو، مسجدونو، فولادي ساختمانونو او نورو اړینو برخو کې کار کړی او د پآم وړ تجربه لري.
دوی وایي، غواړي افغانستان کې د ځینو پروژو تړونونه ترلاسه کړي او پانګونه وکړي.
د کور او ښار جوړولو وزارت محترم سرپرست وزیر شیخ حمدالله نعماني، د یاد شرکت استازو ته د وزارت د مسلکي انجنیرانو یو ټیم ور وپېژاند، څو د کابل ښار په مکرویانو، خوشحال خان مېنه او نیله باغ سیمو کې موجوده ساحې وګوري او ارزونه یې وکړي.
وزیر وایي، دمګړۍ دغه ساحو کې د سوداګریزو مارکېټونو او عصري استوګنیزو کورونو د جوړولو طرحې تر غور لاندې دي.
ښاغلي نعماني زیاته کړه، وزارت یې د ښاري پراختیا انډولیزې پراختیا او جوړښت ته ژمن دی، او هڅه کوي چې له ملي او نړیوالو پانګوالو سره د متقابل باور پر بنسټ دوامدارې او پرمختللې همکارۍ او اړیکې ولري.
د غونډې په پای کې دواړو لوریو د ګډو همکاريو د دوام او مشخصو طرحو د ترتیب ژمنه وکړه.
