د افغانستان کرکټ بورډ له سیلاب ځپلو سره خپله راټوله کړې مرسته، ځانګړې شوې کمېټې ته تسلیم کړه
۱۴۴۵/۱۱/۲۶
د کور او ښار جوړولو وزارت محترم سرپرست وزیر شیخ حمدالله نعماني په خپل کاري دفتر کې د افغانستان ملي کرکت بورډ له راغلي پلاوي سره وکتل.
په دغه پلاوي کې د کرکټ ملي لوبغاړو هر یو محترم رحمت شاه زرمتی، محترم قیس احمد، د کرکټ بورډ استازی محترم محمد همایون شهاب او د کرکت بورډ نورو اړوندو محترمو مسؤلینو یې ملتیا کوله.
راغلي پلاوي له محترم سرپرست وزیر شیخ حمدالله نعماني سره په ناسته کې یادونه وکړه، چې د خپل ایماني او ملي احساس له مخې یې د خپلو سیلاب ځپلو هېوادوالو سره یاده مرسته چمتو کړې او غواړي چې د افغانستان اسلامي امارت د ریاسة الوزرا محترم عالي مقام له لوري د ټاکل شوې کمېټې له لارې یې زیانمنو کورنیو سره د مرستې په پار مصرف کړي.
راغلي پلاوي وویل، معلوم مقدار افغانۍ یې د کمېتې له لوري د افغان ملي بانک په جوړ شوي ځانګړي بانکي حساب کې ټولې کړې او رسید چک یې د کمېتې مشر محترم شیخ حمدالله نعماني ته وسپاره.
په ناسته کې، د کور او ښار جوړولو وزارت محترم سرپرست وزیر شیخ حمدالله نعماني چې د ریاسة الوزرا محترم عالي مقام له لوري د سیلاب ځپلو او بې وزلو کورنیو سره د مرستې راټولولو او مصرفولو کمېتې مشر ټاکل شوی، د کرکټ بورډ له لوري راغلي پلاوي ته د ښه راغلاست ترڅنګ، له سیلاب ځپلو سره د دوی له کړې مرستې مننه وکړه او د الله ج په دربار کې یې د قبولیت دعا ورته وکړه.
محترم شیخ حمدالله نعماني وویل، کرکت بورډ او ملي لوبغاړو تل له خپلو خلکو سره خواخوږي ښودلې، ولس ته یې خوشحالي ورکړې او همدا لامل دی چې دوی هم د هېوادوالو په زړونو کې ځای لري.
د کرکټ بورډ دغه مرسته شوې پیسې چې (۲،۲۷۰،۰۰۰) دوه میلونه، دوه سوه او اویا زره افغانۍ کېږي، چک دړه یې د دواړو ملي لوبغاړو محترم رحمت شاه زرمتي او محترم قیس احمد له لوري د کور او ښار جوړولو وزارت محترم سرپرست وزیر شیخ حمدالله نعماني ته وسپارل شوه.
نوموړي هیله څرګنده کړه چې د ملي لوبغاړو او کرکټ بورډ دغه د مرستې ډول د نورو لپاره د هڅولو لامل وګرځي، تر څو د واحدې سرچینې له لوري خپلې مرستې ترسره کړي چې په بشپړ شفافیت او روڼتیا سره به د ځپل شوو هېوادوالو دردونو ته دوا شي.
د کور او ښار جوړولو وزارت محترم سرپرست وزیر شیخ حمدالله نعماني، د افغانستان کرکټ بورډ او د کرکټ ملي اتلان له ټولو خلکو، سوداګرو، پانګوالو، مرستندویه بنسټونو، هېوادونو او بانکونو غواړي چې د افغان، سیلاب ځپلو، بې وزلو او نورو اړمنو کورنیو سره خپلې مرستې د دغې کمېټې له لوري ترسره کړي چې د ترسره شوو دقیقو سروې ګانو له مخې به د اړتیا سره سم مصرف او له مصرف څخه به یې ډاډ شتون ولري.
