د سرپل ولایت د کور او ښار جوړولو رئیس له قومي مشرانو سره وکتل
۱۴۴۵/۱۱/۱۹
سرپل ولایت کې د کور او ښار جوړولو ریاست محترم رئیس داملا محمد نور نوراني وایي، د یاد ولایت د ګوسفندي ولسوالۍ له قومي مشرانو او مخورو سره وکتل.
ښاغلی داملا محمد نور نوراني وایي، یادو مشرانو ترې غوښتنه وکړه چې د ګوسفندي ولسوالۍ بازار ته دې پراختیا ورکړي، ځکه په وینا یې شته وضعیت د خلکو لپاره بسنه نه کوي او اړتیا ده چې پراختیا پیدا شي.
یادو مشرانو سره په ناسته کې د سرپل ولایت د کور او ښار جوړولو محترم رئیس داملا محمد نور نوراني ویلي، یاده برخه کې به تر خپلې وسې همکاري وکړي، تخنیکي ټیم به ولېږي چې ساحه له نږدې وګوري او د پلان جوړولو برخه کې به خپلو چارو ته دوام ورکړي.
د کور او ښار جوړولو وزارت د ښارونو پراختیا لپاره ساحې له نږدې ګوري او تر ممکنه بریده هڅه کوي چې د پلان مطابق ښارونو ته د خلکو د اړتیا له مخې پراختیا ورکړي، تر څو رامنځته کېدونکی وضعیت د خلکو اړتیاوو ته جواب ویونکی وي.
