د کور او ښار جوړولو وزارت مرستیال د ملګرو ملتونو د سرمنشي له مرستیالې سره وکتل
۱۴۴۵/۱۱/۱۰
د کور او ښار جوړولو وزارت د ښاري چارو محترم مرستیال شیخ مدار علي کریمي بامیاني، په نړیوال امنیت او د سولې په چارو کې د ملګرو ملتونو د سرمنشي له اغلې مرستیالې مېرمن روزمري دیکارلو، د افغانستان لپاره د ملګرو ملتونو د استازي مرستیال ښاغلي مارکس پوتزل او مل هیئت سره وکتل.
اغلې روزمري دیکارلو او ورسره هیئت لومړی د افغانستان په بېلا بېلو ولایتونو کې د وروستیو اورښتونو او سیلابونو له امله د اوښتو مالي او ځاني زیانونو په تړاو خواخوږي ښکاره کړه.
دواړو لوریو په افغانستان کې د روان وضعیت او راتلونکو پراختیایي چارو په تړاو خبرې وکړې.
د کور او ښار جوړولو وزارت د ښاري چارو محترم مرستیال شیخ مدارعلي کریمي بامیاني وویل، افغانستان کې ځینې پراختیایي پروژې د تېرې ادارې په مهال د یو شمېر مرستندویو هېوادونو او نړیوال بانک له لوري په نیمه کاره حالت کې پاتې شوي، چې ایجاب د دې کوي ترڅو بشپړې او ګټې اخیستنې ته وسپارل شي.
نوموړي له راغلي پلاوي غوښتنه وکړه چې د دغه پروژو د بشپړوالي برخه کې مرستندویو هېوادونو او نړیوال بانک ته سپارښتنه وکړي.
محترم شیخ مدار علي کریمي بامیاني وایي، راغلي پلاوي ته یې وویل، اوسمهال افغانستان کې سرتاسري امنیت حاکم دی، د مینې او ورورګلوۍ فضاء حاکمه ده چې د افغانستان ټول ولسونه په کې خوندي دي او خلکو د ارام ساه اخیستې ده.
ښاغلي بامیاني ویلي، نړۍ باید له اسلامي امارت سره تعامل ولري او ملګري ملتونه دې دغه برخه کې بې درېغه هڅې وکړي.
په نړیوال امنیت او د سولې په چارو کې د ملګرو ملتونو د سرمنشي اغلې مرستیالې مېرمن روزمري دیکارلو ویلي، د دوحې راتلونکې ناسته کې به په افغانستان کې د نیمګړو پراختیایي پروژو د بشپړېدا او ګټې اخیستنې په اړه اړوندو هېوادونو او نړیوال بانک ته یادونه وکړي.
د معلوماتو له مخې، مېرمن دیکارلو هوډ څرګند کړی چې په دغه ناسته کې د بحث شوو موضوعاتو په اړه به د دوحې په راتلونکې ناسته کې یادونه کوي او د حل برخه کې به یې هڅې کوي.
