د اوسپنیز کانکریټ تخصصي دورې روزنیز پروګرام پیل شو
۱۴۴۴/۰۶/۰۱
د کور او ښار جوړولو وزارت یو شمېر انجنیرانو ته د اوسپنیز کانکریټ تخصصي دورې د روزنې پروګرام پیل شو، چې شل ورځې به دوام وکړي.
د کور او ښار جوړولو وزارت د مسکن چارو رئیس ښاغلي سید عثمان سادات، دغه پروګرام ګټور وباله چې کولی شي د اوسپنیز کانکریټ د میتودونو او تګلارو زده کړې ترڅنګ په کې انجنیران یو له بل سره خپلې تجربې او نظرونه شریک کړي.
ورپسې د یاد ریاست کارکوونکي ښاغلي انجنیر حسیب کاشفي چې د اوسپنیز کانکریټ تخصصي دورې روزنه ورکوي، د بشري سرچینو له ریاست مننه وکړه، چې د پروګرام په پیلولو کې یې ورسره مرسته کړې او زیاته یې کړه، چې روزنیز موارد ډېر ګټور دي او کولی شي، چې په دغه برخه کې شته ستونزو ته تر یو بریده ځواب ووایي.
دغه راز د کور او ښار جوړولو وزارت د دفتر رئیس ښاغلي سید عبدالحق رحمتیار یادونه وکړه، چې ورته پروګرامونه د وزارت د کارکوونکو کاري ظرفیت لوړوي او هڅه به وکړي چې نور بېلا بېل روزنیز پروګرامونه هم چمتو کړي.
په پای کې د کور او ښار جوړولو وزارت تخنیکي مشاور ښاغلي انجنیر یاسین هوتک وویل، ورته پروګرامونه کولی شي د وزارت اړوند انجنیرانو په تجربو کې زیادت راولي او چارې معیاري شي.
ښاغلي هوتک زیاته کړه، افغانستان یو اسلامي هېواد دی او باید د اسلامي ښارونو په رامنځته کولو کې د کور او ښار جوړولو وزارت بې درېغه هڅې وکړي او نړۍ ته ثابته کړي چې اسلامي ښارونو کې د ټولو اوسېدونکو لپاره حقوق او امتیازات په پام کې نیول کېږي او یوه ودانۍ بلې ته په زیان نه تمامېږي.
