د میرغلام محمد ربیع ښوونځی ګټه اخیستنې ته وسپارل شو
د ښار جوړولو او ځمکو وزارت د ساختماني چارو مرستیال محترم سید نسیم خلیق مزار شریف ته په خپل کاري سفر کې د میرغلام محمد ربیع ښوونځی د بلخ والي او ولایتي مسوولینو په حضور کې پرانیست او ګټې اخیستنې ته وسپاره.
د دې مراسم په ترڅ کې، د بلخ والي محترم محمد اسحاق رهګذر خبرې وکړې او د ښار جوړولو او ځمکو وزارت نقش یې د ځمکو په تنظیم، ښاري پراختیا او ساختماني پروژو په تطبیق کې خورا مهم وباله او د ساختماني پروژو پر تطبیق او پای ته رسونې ټینګار وکړ.
ورپسې، د ښار جوړولو او ځمکو وزارت د ساختماني چارو مرستیال محترم سید نسیم خلیق خبرې وکړې او بلخ ولایت یې د یاد وزارت لپاره یو له مهمو ولایتونو څخه یاد کړ او زیاته یې کړه چې د ښار جوړولو او ځمکو وزارت په دې وروستیو کې په بلخ ولایت کې د ۴۵ ساختماني پروژو د تطبیق چارې پیل کړي چې له دې ډلې، ۱۰ پروژې ګټې اخیستنې ته سپارل شوي، ۱۹ پروژې د تطبیق په حال کې دي، ۵ پروژې په تدارکاتو او پاتې ۱۱ نورې د سروې او ډیزاین په مرحله کې دي.
د ساختماني چارو مرستیال د ساختماني پروژو پر ژر تطبیق ټینګار وکړ او د بلخ د ښارجوړولو او ځمکو ریاست ته لارښوونه وکړه ترڅو په دې برخه کې جدي پاملرنه وکړي.
د میرغلام محمد ربیع ښوونځی د ښارجوړولو او ځمکو وزارت له خوا د قطعات پیش ساخت د ټکنالوژی په مرسته په دوه پوړو کې د ۲۳ میلیونه افغانیو په ارزښت جوړ شوی دی.
###
