کابل کې د غالیو اوبدونکیو صنعتي ښارګوټي تفصیلي پلان منظور شو
د ښار جوړولو او ځمکو وزرات سرپرست محترم محمود کرزي له کابل والي محترم محمد یعقوب حیدري سره د لېدنې په څنډه کې چې د دې وزارت نورو معینانو په کې هم ګډون کړی و، د کابل شکردرې ولسوالۍ لپاره د غالیو اوبدونکیو صنعتي ښارګوټي تفصیلي پلان منظور کړ.
د ښارجوړولو چارو معین محترم روښان ولسمل د یاد ښارګوټې د ماسټر پلان په اړه د مالوماتو وړاندې کولو پر مهال وویل، دا ښارګوټی پر نږدې ۳ زره جریبه ځمکې جوړېږي.
نوموړي زیاته کړه، په یاد ښارګوټي کې ۴۸۴۱ هستوګنیزې نمرې، ۳۰۷ صنعتي سیمې، ۵۰ هستوګنیز بلاکونه او ۷۷ سوداګریز بلاکونه شامل دي.
د غالیو اوبدونکیو ښار ګوټی د هستوګنیزو نمرو او صنعتي او سوداګریزو سیمو تر څنګ د کلینیک، ښوونځي، وړکتون، زرغونې سیمې، کتابتون او نورې بېلابېلې عامه برخې هم لري.
د ښار جوړولو او ځمکو وزارت د ښار جوړلو چارو معینیت له لارې د جلالتمآب ولسمشر په لارښوونه د غالیو صنعت ودې په موخه په ننګرهار، بلخ، کندز او کابل کې د غالیو اوبدونکیو لپاره څلور ښار ګوټي جوړ کړي دي.
