د نوي کابل ښار د پراختیا چارې په پنځه بېلا بېلو برخو کې په چټکۍ روانې دي او د بنسټیزو پروژو د کیفیت او معیاري تطبیق جدي څارنه هم دوام لري
۱۴۴۷/۱۲/۲۳
د کور او ښار جوړولو وزارت د محترم وزیر الحاج مولوي نجیب الله حیات حقاني په هڅو او د لازمو اسانتیاوو او زمینې برابرولو سره، دا مهال د نوي کابل ښار په بېلابېلو برخو کې شاوخوا پنځه پراختیایي شرکتونه په فعاله توګه د بنسټیزو او عمراني پروژو پر تطبیق بوخت دي.
د دغو پروژو موخه د یوه عصري، معیاري او دوامدار ښاري چاپېریال رامنځته کول دي، څو د راتلونکو نسلونو لپاره د استوګنې، سوداګرۍ او ښاري خدماتو مناسب فرصتونه برابر شي.
د نوي کابل ښار د پراختیا محترم عمومي ریاست تر چتر لاندې تخنیکي او مسلکي ټیمونه، انجنیران او د اړوندو ریاستونو مسؤلین په دوامداره توګه د روانو پروژو له ساحو څخه لیدنې او تخنیکي څارنې ترسره کوي.
دغه څارنې د دې لپاره دي چې ټولې چارې د منظور شوو پلانونو، تخنیکي معیارونو او رسمي نقشو مطابق پرمخ لاړې شي او د غیر پلاني ودې، ناقانونه ساختماني فعالیتونو او تخنیکي سرغړونو مخنیوی وشي.
وسمهال په نوی کابل ښار کې د سړکونو د شبکو جوړول، د اوبو رسونې او فاضله اوبو د مدیریت سیسټمونو طرح او تطبیق، د برېښنا د لېږد او توزیع شبکو جوړول، د استوګنیزو او سوداګریزو زونونو د بنسټیزو خدمتونو برابرول او د عامه تأسیساتو د جوړولو چارې په چټکۍ سره روانې دي.
د نوي کابل ښار د پراختیا عمومي ریاست ټینګار کوي چې د ټولو پروژو تطبیق به د منظور شوو تخنیکي اسنادو، انجنیري معیارونو او ملي پراختیایي پالیسۍ له مخې ترسره شي.
یاد ریاست ژمن دی چې د معیاري زیربناوو په رامنځته کولو سره به د نوي کابل ښار د ابادۍ، اقتصادي ودې او ښاري پرمختګ بهیر لا چټک او اغېزمن کړي.
