ښار جوړولو او ځمکو وزارت سرپرست وزیر د بهرنیو چارو وزارت د تشریفاتو له عمومي رئیس سره وکتل
ښار جوړولو او ځمکو وزارت سرپرست وزیر محترم محمود کرزی د بهرنیو چارو وزارت د تشریفات له عمومي رئیس ښاغلي خالد غفاري سره وکتل او یو شمېر سفارتونو ته د ځمکو د انتقال د څرنګوالي په اړه خبرې وکړې.
په سر کې، ښاغلي خالد غفاري یو شمېر سفارتونو ته د ځمکو د انتقال د پروسې په اړه د ښار جوړولو او ځمکو وزارت له بېدریغه او هر اړخیزه همکاریو مننه وکړه او په ځانګړې توګه ایران سفارت ته د دوو قطعو ځمکو انتقال، اروپایي اتحادیې ته د سیمه ییزو ارګانونو خپلواکه ادارې او د پخواني مرکزي احصایې د ودانیو انتقال، انګلستان سفارت ته د یوې قطعې ځمکې انتقال او د حق الاجارې د ستونزې حل او د ماریوت هوټل په تړاو د قرار دادي شرکت د ستونزې د هوارۍ په اړه خبرې وکړې او د یاد وزارت له مشرتابه څخه د ذکر شویو موضوعاتو په اړه د همکاری غوښتنه وکړه.
ورپسې، ښار جوړولو او ځمکو وزارت سرپرست وزیر محترم محمود کرزی ټولګټو پروژو د تطبیق لپاره د ځمکو انتقال د یاد وزارت له کاري لومړیتوبونو څخه وباله او زیاته یې کړه چې دا وزارت ټولو حکومتي ادارو بالخصوص بهرنیو چارو وزارت ته د ځمکو د انتقال په برخه کې په پوره توګه همکاري کوي.
ښار جوړولو او ځمکو وزارت سرپرست وزیر د بهرنیو چارو له وزارت څخه وغوښتل ترڅو د ځمکو د انتقال په اړه مشخص وړاندیزونه دې وزارت ته واستوي ترڅو د اړتیا وړ ځمکه د ښار جوړولو او ځمکو وزارت له لوري بهرنیو چارو وزارت ته انتقال شي. همدارنګه محترم محمود کرزی خصوصي سازي عمومي ریاست ته لارښوونه وکړه د بهرنیو چارو وزارت سره په ګډه په دې اړه عاجل اقدام ترسره کړي.
په همدې ترتیب، ښار جوړولو او ځمکو وزارت سرپرست وزیر ښاري چارو معینیت ته لارښوونه وکړه ترڅو د ساختماني کوډونو او نورمونو او د کابل ښار د نوي منظور شوي پلان له مخې اړین تخنیکي معلومات دې له اروپایي اتحادیې سره شریک او په تخنیکي برخه کې له یادې ادارې سره پوره همکاري وکړي.
سربېره پردې، د انګلستان سفارت د ځمکې د حق الاجارې په اړه ښار جوړولو او ځمکو سرپرست وزیر له بهرنیو چارو وزارت څخه وغوښتل ترڅو یاد وزارت دې د انګلستان سفارت سره په همغږي دا موضوع حل او فصل کړي او د اړتیا په صورت یاده موضوع دې د کابینې غونډې ته وړاندې کړي.
همدارنګه، د ماریوت هوټل د قرار دادي شرکت د ستونزې د روښانتیا لپاره خصوصي سازي عمومي ریاست ته لارښوونه وشوه ترڅو د امریکې له سفارت څخه د پروژې په تړاو بشپړ معلومات راټول او د معلوماتو د ارزونې او مطالعې وروسته د یادې ستونزې په اړه پریکړه وشي.
###
