ډېر ژر به په کابل کې د قطر هستوګنیزې پروژې چارې بېرته پیل شي
۱۴۴۳/۱۰/۱۴
د ښار جوړولو او ځمکو وزارت سرپرست محترم مولوي حمدالله نعماني په کابل کې د قطر هېواد د هستوګنیزې نیمه کاره پاتې پروژې له چارو لیدنه وکړه.
د قطر هېواد هستوګنیزه پروژه د کابل ښار په پنځمه ناحیه کې موقعیت لري چې ښاغلي مولوي حمد الله نعماني یې له ستونزو او پرمختګونو څخه لیدنه وکړه.
وزیر مولوي حمد الله نعماني هوډ لري چې د نورو ټولګټو پروژو ترڅنګ دغه پروژه ډېر ژر بېرته په کار پیل وکړي او ګټې اخیستنې ته وسپارل شي.
د قطر د هستوګنیزې پروژې د بلاکونو د جوړولو تړون، افغانستان کې د تېر حکومت په مهال د قطر الغرافه خیریه مؤسسې او یو ساختماني شرکت ترمنځ لاسلیک شو.
دغه هستوګنیزه پروژه په کابل کې د مهمو رهایشي پروژو له ډلې ده چې د (۱۱۰) میلیونه بلا عوضه امریکایي ډالرو په لګښت به جوړ او ګټې اخیستنې ته وسپارل شي.
یاده پروژه په (۳۲) جریبه ځمکه کې جوړېږي چې (۱۲) منزله(۸)بلاکونه او (۷۸۶) د اوسېدو ځایونه لري، اووه منزله (۳) سوداګریز بلاکونه، یو جامع مسجد، دوه ښوونځي، یو د یتیم روزنې ځای (دارالایتام) او دو پنځه منزله تجارتي مرکزونه به ولري.
