په کندز ښار کې د ښاري تخلفاتو مخنیوی وشو
۱۴۴۷/۰۸/۰۷
د کندز ولایت د کور او ښار جوړولو ریاست د ښاري تخلفاتو ټیم د ښار په بېلابېلو ناحیو کې د نظارت پر مهال هغه ودانیزې چارې وموندلې چې د ښاري پلان، نافذه قوانینو او د کور او ښار جوړولو وزارت د طرزالعملونو خلاف روانې وې.
د ترسره شوي نظارت پر مهال، د ماشوم او مور د روغتون ترڅنګ یو شمېر دوکانونه پرته له قانوني جواز او رسمي اسنادو په خپل سري ډول د جوړېدو په حال کې وو. همدارنګه، د کابل بندر په سیمه کې د پوهنتون پر نفش سړک یو ودانیز تعمیر د منظور شوي پلان خلاف تر کار لاندې و.
د ښاري تخلفاتو ټیم د یادو سرغړونو د مخنیوي په موخه د دغو ودانیزو چارو کارونه ودرول او د ودانیو مالکینو ته یې لارښوونه وکړه چې خپل فعالیتونه ژر تر ژره د نافذه قوانینو، مقرراتو او د کور او ښآر جوړولو وزارت د طرزالعملونو له مخې تنظیم او پر مخ یوسي.
د کندز ولایت د کور او ښار جوړولو ریاست د ښاري تخلفاتو ټیم په دوامدار ډول د ښار بېلابېلې سیمې تر څارنې لاندې نیسي، تر څو د ناقانونه رغونو، د ښاري پلان د سرغړونو او خپل سري ودانیزو چارو مخه ونیسي.
