په پکتیکا کې ۳۵۰۰ جریبه ځمکه کې د مهاجرینو ښارګوتی جوړیږي
۱۴۴۶/ ۱۱/۱۰
د ریاسة الوزرا محترم اداري مرستیال مولوي عبدالسلام حنفي په ملتیا د کور او ښار جوړولو وزارت محترم سرپرست وزیر الحاج شیخ حمدالله نعماني په پکتیکا ولایت کې راغلو مهاجرو ته د نمرو د ویش لړۍ پیل کړه.
په مراسمو کې د پکتیکا محترم والي مولوي عبدالخالق عابد له مرکز کابل څخه ورغلي هیئت ته ښه راغلاست ویلو ترڅنګ مننه وکړه چې د دغه ولایت مهاجرینو د دایمي اوسیدو زمینه برابره کړه، نوموړي د کور او ښار جوړولو وزارت ځانګړې مننه وکړه چې امارتي ځمکي د یو منظم او معیاري ښارګوټي په چوکاټ کې ډیزاین او ویشي.
ورپسې د ریاسة الوزرا محترم اداري مرستیال مولوي عبدالسلام حنفي د مهاجرو پر وړاندې د اسلامي امارت په مسؤلیت او اقداماتو خبري وکړې او زیاته يی کړه، امارت د خپلواکۍ تر لاسه کولو سربیره د خپلو خلکو خدمت ته مټې بډوهلې دي.
راغلو مهاجرو ته د ځمکو د ویش مراسمو کې د کور او ښار جوړولو وزیر شیخ حمدالله نعماني وویل، ګاونډي هیوادونه د ټولو انساني او اسلامي ارزښتونو خلاف چلند کوي او افغان مهاجر په اجباري توګه راباسي.
ښاغلي نعماني د نړۍ، سیمې او ګاونډ هیوادونو غږ وکړ چې د مهاجرو برخه کې خپل مسؤلیتونه ترسره کړي.
سرپرست وزیر وویل، پکتیکا ولایت په مرکز کې یو ښارګوټی د ۳۵۰۰ جریبه ځمکې په مساحت او ۱۶۵۲ نمرو په درلودو پرانیزو.
نوموړي زیاته کړه دغه ښاګوټی معیاري جوړیږي او ژوند اړتیا هرې برخې ته پکې پام شویدی.
یاد ښارګوټی ۴۸۳ پنځه بسوه يی، ۸۶۶ لس بسوه يی او ۳۰۳ پنځلس بسوه يی نمرې چې ورسره ۱۷ مسجد او مذهبي ځایونه، ۱۰ ښوونځي، وړکتون، ۸ سوداګریز مرکزونه، کلینیکونه او روغتون، ۶۷ سوداګریز بلاکونه، د اوروژنې سیستم او داسې نور جوړیږي.
په مراسمو کې د پکتیکا قومي مشرانو د امارت دغه عمل وستایه مننه يي وکړه او د هر راز همکارۍ ټټر يي وډباوه.
