په هلمند کې د لقمان حکیم سوداګریز او هستوګنیز مارکېټ د ساختماني چارو تخنیکي څارنه ترسره شوه
۱۴۴۷/۰۵/۱۴
د هلمند ولایت د کور او ښار جوړولو ریاست محترم رئیس ملا محمد نعیم متعمد وایي، د دې ریاست اړوند تخنیکي ټیم د لقمان حکیم سوداګریز او هستوګنیز مارکېټ د ودانیزو چارو څخه تخنیکي نظارت ترسره کړ.
ښاغلي ملا معتمد وویل، یاده پروژه د لښکرګاه ښار په لومړۍ ناحیه، لغمان جاده کې موقعیت لري. د تخنیکي ټیم د معلوماتو له مخې، دا مهال د سي بلاک د یوې برخې د پارټیشن، پلاستر، د برېښنا د ویرینګ چارې روانې دي.
د نوموړي په خبره، د ساحې مسؤل انجنیر ته لارښوونه وشوه چې د موادو ټاکل شوی مارک په دقت مراعات کړي او د اوبو ورکولو پروسه په معیاري توګه ترسره کړي.
د کور او ښار جوړولو وزارت د هېواد په بېلابېلو ولایتونو کې د ودانیزو پروژو د کیفیت او تخنیکي معیارونو د خوندي ساتلو لپاره دوامداره څارنې ترسره کوي.
