په ننګرهار ولایت کې د کډوالو د ښارګوټي لپاره توپوګرافي سروې ترسره شوه
۱۴۴۷/۱/۱۲
د کور او ښار جوړولو وزارت د GIS او سروې ریاست تخنیکي ټیم، د ننګرهار ولایت د کور او ښار جوړولو ریاست له مسلکي کارکوونکو سره په ګډه، د یاد ولایت د روداتو ولسوالۍ په روغانو سیمه کې د کډوالو او بېرته راستنېدونکو لپاره د ښارګوټي توپوګرافي سروې ترسره کړه.
د کور او ښار جوړولو وزارت د جي ای ایس ریاست محترم رئیس حافظ انجنیر یوسف لطیف وایي، چې یاد تخنیکي ټیم د کډوالو لپاره ځانګړې شوې ۱۸،۱۸۹ جریبه ځمکه سروې کړه.
د نوموړي په وینا، دا سروې د هغو تخنیکي معلوماتو راټولولو ته زمینه برابروي چې د کډوالو ښارګوټي لپاره د تفصیلي پلان جوړولو، بنسټیزو تأسیساتو، او خدماتي اسانتیاوو لپاره اړین دي.
همداراز، د ننګرهار ولایت د کور او ښار جوړولو ریاست محترم رئیس مولوي محمد نبي سعیدي وویل، چې یاده سروې د مسلکي ټیم له خوا په معیاري تخنیکي وسایلو ترسره شوې ده، څو د ځمکې طبیعي جوړښت، ارتفاعي توپیرونه، د اوبو مسیرونه او د سیمې حدود په دقیقه توګه ثبت شي.
په ورته وخت کې انجنیر لطیف زیاته کړه چې د سروې پایلې به د وزارت اړوندو ریاستونو سره شریکې شي، ترڅو د کډوالو د ښارګوټي لپاره یو مناسب، منظم او د اړتیاوو مطابق تفصیلي پلان طرحه شي، چې د ملي پراختیا، خدماتو او د استوګنې د ښه تنظیم لپاره مهم بنسټ اېږدي.
دا تخنیکي سروې به د هېواد د هغو زرګونه راستنو کډوالو لپاره چې د ژوند د نوې مرحلې پیل ته سترګې په لار دي، یو عملي ګام وبلل شي.
