په میدان وردک کې د مهاجرینو په ښارګوټو کې د اوبو د سرچینو سروې بشپړه شوه
۱۴۴۷/۰۳/۰۸
د میدان وردک ولایت د کور او ښار جوړولو ریاست محترم رئیس مولوي عبدالقیوم سیفالعمر وایي، د کلیو او پراختیا وزارت تخنیکي هئیت د کور او ښار جوړولو او د مهاجرینو چارو ریاستونو په همکارۍ، د ده پاک مهاجرینو ښارګوټي او نرخ ولسوالۍ د ځمکنیو اوبو د سرچینو د سروې او ارزونې بهیر بشپړ کړ.
ښاغلي مولوي سیف العمر وویل، دغه سروې د جیوفزیک پرمختللو ماشینونو او وسایلو په وسیله ترسره شوې چې پایلې به یې د یادو سیمو د ځمکنیو اوبو د ظرفیت په دقیقه پېژندنه کې بنسټیز رول ولري، چې د سروې اصلي موخه د ځمکنیو اوبو د سطحې وضعیت روښانه کول او د مهاجرینو ښارګوټو لپاره د څښاک د اوبو د تأمین امکان سنجول دي.
د نوموړي په خبره، د مهاجرینو د بېرته راستنېدو د کچې په زیاتېدو سره، دا اقدام د دوامدارو اوبو د سرچینو په برابرولو او د خلکو د ژوند د ښه والي په لور یو مهم ګام بلل کېږي او همداراز د کور او ښار جوړولو او د مهاجرینو ریاستونو ګډ کار د دولتي ادارو د ګډې ارادې څرګندونه کوي چې د مهاجرینو کورنیو ته د اساسي خدمتونو په وړاندې کولو کې عملي ګامونه پورته کړي.
د یادولو وړ ده، په میدان وردک کې د ځمکنیو اوبو د سرچینو د سروې بشپړېدل د مهاجرینو ښارګوټو او سیمو د دوامدارو اوبو د برابرولو او د ژوند د شرایطو د ښه والي لپاره مهم او بنسټیز ګام دی.
