په غزني ولایت کې د ابوریحان بېروني مقبره رغول کېږي
د جمهوري ریاست لوړ مقام د هدایت پر بنسټ، په غزني ولایت کې د ابوریحان بېروني مقبرې د رغولو او د طرحې جوړولو په موخه د ښار جوړولو او ځمکو وزارت د ودانیزو چارو معینیت تر نظر لاندې د تاریخي ابدو او جوماتو د ترمیم او بیا رغولو پروژې امریت متخصصینو ډلې له سیمې د مطالعاتو، سروې او ارزونې وروسته، یوه ځانګړې طرحه ترتیب کړه او د ملاحظې لپاره یې د جمهوري ریاست لوړ مقام ته واستوله او تائید شوه.
د دې مقبرې طرحې ترکیب د غزنویانو او اسلامي معمارۍ په سبک جوړ شوی او پلان یې یو اته ضلعي ستوری دی چې له بهرامشاه منار څخه یې الګو اخېستل شوې ده. په دې طرحه کې د ښایست په موخه د سلطان مسعود له منار څخه هم الهام اخیستل شوی او د دې طرحې په لوړه برخه کې هڅه شوې ده چې د لېندیو او کمانونو بڼه یې له اسلامي مډرنو معماریو څخه جوړه شي چې په ښکلا کې یې لا ډېر زیاتوالی راشي.
همداراز، په دې طرحه کې هڅه شوې ده چې د ستر پوهان ابوریحان بېروني کړنو ته پوښښ ورکړل شي او له کومه ځایه چې هغه د خپلې دورې یو له مهمو ستور پېژندونکیو څخه وو، په پام کې ده چې د دې طرحې په پلي کېدو سره د مقبرې په چت کې لمریزې منظومې تر څنګ د لمر رڼا فېلټر او شمسي منظومې سیوری جوړ شي چې دا چاره لېدونکیو ته د هغه د ستور پېژندنې انځور وړاندې کوي.
دا پروژه پر ۷۲۰۰ متر مربع ځمکې د غزني په تاریخي ښار کې جوړېږي چې پهکې مقبره، د ټکټ پلورلو ځای، د ساتونکیو خونه، عصري تشنابونه، تمځای، پلې لارې او زرغونې سیمې شاملې دي چې په نږدې راتلونکي کې به یې د جوړولو چارې پیل شي.
