محترم محمد جواد پیکار د کندهار ولایت لپاره اووه تفصیلي او سټراټیژیک پلانونه منظور کړل
د ښار جوړولو او ځمکو سرپرست وزیر محترم محمد جواد پیکار د کندهار له والي محترم حیات الله حیات او په ملي شورا کې د دغه ولایت د استازو په حضور کې د کندهار ولایت لپاره اووه تفصیلي او سټراټیژیک پلانونه منظور کړل.
لومړی د دامان ولسوالۍ د صنعتي پارک تفصیلي پلان دی چې پر ۱۱۱۷ جریبه ځمکې د ۲۸۸ نومرو او ۸ سوداګریزو بلاکونو په لرلو سره د ښار جوړولو او ځمکو وزارت لهخوا ډیزاین شوی دی.
دویم پلان د کندهار ولایت په ژېړۍ ولسوالۍ کې د امنیتي او دفاعي ځواکونو د شهیدو شویو منسوبینو کورنیو د ښارګوټي تفصیلي پلان دی چې پر ۲۱۱۲ جریبه ځمکه د ۲۸۰۰ استوګنیزو نومرو، ۴۲ استوګنیزو او ۹۷ سوداګریزو بلاکونو په لرلو سره ډیزاین او منظور شو.
دې سره جوخت پر ۴۵۴ جریبه ځمکې باندې د غازي عبدالله خان په نوم په کندهار ښار کې د یوه ښارګوټي تفصیلي پلان هم منظور شو. د یاد تفصیلی پلان پر اساس دغه ښارګوټی ۹۴۰ استوګنیزې نومرې، ۱۳ استوګنیز او ۸ سوداګریز بلاکونه لري.
د ښار جوړولو او ځمکو سرپرست وزیر دغه راز په کندهار ښار کې د غازي امان الله په نوم د یوه بل ښارګوټي تفصیلي پلان هم منظور کړ. دغه ښارګوټی پر ۴۰۷ جریبه ځمکه باندې د ۱۰۵۰ استوګنیزو نومرو، ۲۰ استوګنیزو او ۴ سوداګریزو بلاکونو په لرلو سره ډیزاین شوی دی.
په ورته وخت کې د حمیدي مېنې ښارګوټي تفصیلي پلان هم منظور شو. دغه پلان په ۳۶۷ جریبه ځمکه کې ۴۵۵ استوګنیزې نومرې لري.
محترم محمد جواد پیکار دې سره په خوا کې د کندهار ولایت د ژېړي او د ارغنداب ولسوالیو لپاره د سټراټیژیک انکشاف دوه بېلابېل پلانونه هم منظور او د کندهار ولایت اړوندو چارواکو ته یې د تطبیق په موخه وسپارل.
د یادونې ده چې پورتني پنځه تفصیلي پلانونه په ټولیزه توګه ۴۴۵۸ جریبه ځمکې باندې ۵۵۳۳ استوګنیزې نومرې، ۷۵ استوګنیز او ۱۱۷ سوداګریز بلاکونه لري چې په تخمیني توګه ۹۸۰۰ تنو د کاري فرصتونو پر برابرولو سربېره، د دولت بودجې ته په هم تخمیني توګه ۳۷۴۲ مېلیونه افغانۍ عاید کوي.
د ښار جوړولو او ځمکو سرپرست وزیر د کندهار له والي څخه وغوښتل چې د استوګنیزو نومرو او واحدونو په وېش کې د روڼتیا لپاره یوه کړنلاره جوړه کړي.
په پای کې د کندهار والي محترم حیات الله حیات، د ښار جوړولو او ځمکو سرپرست وزیر څخه د یادو پلانونو منظور کولو له امله مننه وکړه.
