محترم محمد جواد پیکار: د ننګرهار د ټولو پراختیايی پروژو چارې دې چټکې شي
د ښار جوړولو او ځمکو سرپرست وزیر محترم محمد جواد پیکار د ننګرهار والي محترم شاه محمود میاخېل سره په لیدنه کې په یاد ولایت کې د روانو پروژو د تطبیق د لړۍ ارزونه وکړه.
په لومړي سر کې د ننګرهار والي په دغه ولایت کې ښوونکیو لپاره د بحرآباد، د قاسم آباد کډوالو، د کامې د ښوونکیو، په کوټ او بټي کوټ ولسوالیو کې د امنیتي او دفاعي ځواکونو د شهیدو سرتېرو کورنیو، د شهید زړور ذاهد ښارګوټیو ژر تطبیق او د قاسم آباد او بحرآباد ښارګوټو انکشافي پلانونو ترتیب، جلال آباد ښار لپاره د ساساکي پلان او د تورخم وچې بندر په اړه د ترسره شویو فعالیتونو په تړاو د رپوټ په ورکولو سره د کارونو د چټکتیا غوښتنه وکړه.
ورپسې د ښار جوړولو او ځمکو سرپرست وزیر وویل، د یادو ښارګوټو له ډلې د څلورو هغو تفصیلي پلانونه تر تخنیکي ارزونې وروسته منظور شوي او ترڅنګ یې د نورو انکشافي پروژو د چارو چټکتیا په تړاو لازمې لارښوونې وکړې.
محترم محمد جواد پیکار وویل، ښوونکیو لپاره د بحرآباد ښارګوټي د ځمکې د انتقال چارې بشپړې شوي او اړوندې ادارې ته تر سپارل کېدو وروسته به د هغه د وېش لړۍ پیل شي.
د ښار جوړولو او ځمکو سرپرست وزیر همدا رنګه زیاته کړه چې کډوالو لپاره د قاسم آباد ښارګوټي تفصیلي پلان منظور شوی او د ننګرهار د ښار جوړولو او ځمکو ریاست ته یې هم دنده وسپارله چې د دغه ښارګوټي د عملي کار تر پیل پورې د هغه ځمکې حفظ کړي.
محترم محمد جواد پیکار وویل، د یاد ښارګوټي عملي چارې به د هند د ۳۰ مېلیونه ډالرو په مالي مرسته ډېر ژر پیل شي.
د ښار جوړولو او ځمکو سرپرست وزیر اړوندو برخو ته لارښوونه وکړه چې په ۳۰۰ جریبه دولتي ځمکه باندې دې د کامې ولسوالۍ د ښوونکیو ښارګوټي لپاره ژر تر ژره تفصیلي پلان چمتو کړي او د ځمکې انتقال وړاندیز دې هم کابینې ته وړاندې کړي.
محترم محمد جواد پیکار وویل، په کوټ او بټي کوټ ولسوالیو کې د امنیتي او دفاعي ځواکونو د شهیدو سرتېرو کورنیو لپاره د دوو ښارګوټو د سروې چارې ترسره شي.
نوموړي همدا راز د ننګرهار ولايت د ښار جوړولو او ځمکو ریاست ته سپارښتنه وکړه چې د بحرآباد او قاسم آباد ښارګوټو انکشافي پلانونه وروستي کړي او د منظورۍ لپاره دې مرکز ته راولیږي.
محترم محمد جواد پیکار پر ۱۰۰ جریبه ځمکه د شهید زړور ذاهد ښارګوټي په اړه د ځمکو انتقال ریاست ته دنده وسپارله چې د هغه د انتقال وړاندیز دې کابینې ته وړاندې کړي.
د ښار جوړولو او ځمکو سرپرست وزیر وویل، د جلالتمآب جمهور رئیس له لارښوونې سره سم د جلال آباد ښار لپاره د ساساکي پلان د جوړولو چارې روانې دي او اړوندې کمېټې ته یې هم دنده وسپارله چې د ننګرهار والي او نورو غړیو سره په ګډه د هغه پر پاتې برخو کار وکړي.
محترم محمد جواد پیکار په پای کې وویل، د تورخم په وړه ډکه سیمه کې د وچې بندر ډیزاین چارې دې د یاد وزارت د ښاري پلانونو طرحې عمومي ریاست له خوا جوړ او اړوندو ادارو سره په ګډه د هغه پاتې چارې پر مخ یوړل شي.
