لغمان کې د ځینو سیمو لپاره د بهسازۍ پلان جوړېږي
۱۴۴۵/۱۰/۱۱
د کور او ښار جوړولو وزارت هڅه کوي چې هېوادوالو ته مناسبه سرپناه، چاپېریال او ښاري ژوند برابر کړي.
لغمان کې د کور او ښار جوړولو ریاست محترم رئیس مولوي حسین احمد تېلوي وایي، هڅه کوي چې خلکو ته د هوسا ژوند برابرولو برخه کې اغېزمن ګامونه پورته کړي.
نوموړی وایي، په پام کې لري چې په دغه ولایت کې ځینې غیرپلاني ساحې بهسازي کړي او شته ستونزو ته تر یو بریده حل لاره وګوري.
ښاغلي مولوي تېلوي او ورسره د انجنیرۍ ټیم یې، په همدې موخه د لغمان د مهترلام ښاروالۍ له محترمو مسؤلینو سره ناسته وکړه.
ناسته کې، مولوی حسین احمد تېلوي د غیري پلاني ساحو د بهسازۍ په اړه هر اړخیز معلومات وړاندې کړل او یاده چاره یې د اسلامي امارت او ولس لپاره ښه اقدام وباله.
لغمان ولایت کې د کور او ښار جوړولو ریاست د معلوماتو له مخې، د مهترلام ښاروالۍ محترمو مسؤلینو بشپړ ډاډ ورکړی چې په یاده برخه کې به هر ډول همکاري او همغږي ترسره کړي.
