د کور او ښار جوړولو وزارت په مشرۍ ګډ پلاوي د تورخم د نوې ښار جوړولو طرحې ارزونه وکړه
۱۴۴۷/۰۶/۰۶
د ا.ا.ا د ریاسة الوزرا محترم عالي مقام د حکم پر اساس د کور او ښار جوړولو وزارت د محترم وزیر الحاج مولوي نجیب الله حیات حقاني په مشرۍ ، یو ګډ امارتي پلاوی چې په ترکیب کې یې الحاج مولوي حمدالله نعماني د مخابراتو او معلوماتي تکنالوجۍ وزیر، الحاج مولوي احمدالله زاهد د صنعت او سوداګرۍ وزارت مرستیال، مولوي محمود مظلوم د اراضۍ عمومي رئیس، مفتي عبدالمتین سعید د مالیې وزارت د ګمرکاتو مرستیال، د ننگرهار محترم والي او د ننگرهار د کور او ښار جوړولو محترم رئیس مولوي نبي الله سعیدي شامل وو، د ننگرهار ولایت د ډکې ساحې څخه یې لیدنه وکړه.
پلاوي د تورخم د نوي بازار د انتقال او د نوې ښاري طرحې ارزونه په تفصیل سره وکړه او د وزارت تخنیکي ټیم د نوې سیمې د پراختیا اساسي برخې تشریح کړې چې د پروژې د موخې په اړه بشپړ وضاحت وړاندې شو.
د طرحې په محتوا کې د سوداګرۍ منظمېدل، د ترافیکي ازدحام کمېدل، د ترانزیټ اسانتیا، د خلکو لپاره د مناسبې ښاري فضا برابرول، د عامه خدمتونو پراختیا او د ختیځ زون اقتصادي پرمختګ مهم ټکي وو.
ګډ پلاوي د طرحې تخنیکي کیفیت وستایه او د همغږۍ د لا زیاتېدو سپارښتنې یې وکړې.
د کور او ښار جوړولو وزارت محترم وزیر الحاج مولوي نجیب الله حیات حقاني، ټینګار وکړ چې دغه پروژه د عالي مقام د ځانګړې پاملرنې لاندې ده او وزارت به یې ټولې برخې د ملي معیارونو سره سم پر مخ بیایي.
نوموړي زیاته کړه، د دې پروژې عملي کېدل به نه یوازې د سوداګرۍ لپاره یو معیاري مرکز رامنځته کړي، بلکې خلکو ته به د ژوند، کار او خدماتو نوي امکانات هم برابر کړي.
په لیدنه کې د ننگرهار محترم والي او سیمه ییزو مسوولینو د هر اړخیزې همکارۍ ډاډ ورکړ او د ګډو امارتي هڅو د پایلې په توګه یې دغه طرحه مهم پرمختګ یاد کړ.
