د کور او ښار جوړولو وزارت سرپرست د (الصحابة فی افغانستان) کتاب مخکتنه کې
۱۴۴۶/۰۸/۰۴
د کور او ښار جوړولو وزارت محترم سرپرست وزیر الحاج شیخ حمدالله نعماني په کابل کې د (الصحابة فی افغانستان) کتاب مخکتنه کې برخه واخیسته او ارزښتناکه وینایې وکړه.
ښاغلي شیخ حمدالله نعماني، د کتاب موضوع مهمه وبلله او په کې یې د لا زیاتې هڅې کولو غوښتنه وکړه.
نوموړي وویل، د مصروفیتونو سره سره یې چې د یاد کتاب مطالعه تر یو بریده وکړه، ورته معلومه شوه چې، باید لا زیات وضاحت په کې ورکړل شي.
د هغه په خبره، دا کتاب باید د افغانستان په مرجو ژبو ولیکل شي، ځکه په وینا یې ټول ورته اړتیا لري او د ټولو لپاره ویاړ دی.
د ښاغلي شیخ حمدالله نعماني د نورو خبرو ترڅنګ بله سپارښتنه دا وه چې، کتاب کې د پخوانیو نومونو ترڅنګ دې هماغه ځایونه د اوسنۍ جغرافیې او نوم په ډول هم ولیکل شي، تر څو لوستونکي ته لا زیات وضاحت ورکړل شي.
د معلوماتو له مخې، د (الصَّحَابَةُ في أفغانستان) کتاب د مفتي محمد شريف راشد تألیف دى چې، په (۱۴۴۵) هجري قمري کال د ازادۍ دولتي مطبعې له لوري د (۵۰۰) ټوکو په تیراژ، دوو بابونو او (۲۸۰) مخونو کې چاپ شوى دى.
په دغه تاریخي او معلوماتي کتاب کې د یو شمېر انبیاء کرامو ترڅنګ، د هغو (۲۴) جلیل القدره صحابه کرامو (رضي الله عنهم) ژوندلیکونه راټول شوي چې، د افغانستان پر خاوره یې مبارک قدمونه ایښي او د مبلغینو او فاتحینو په توګه دغه هېواد ته راغلي وو.
