د ښار جوړولو او ځمکو سرپرست وزیر د کلیو د بیا رغونې او پراختیا له وزیر سره په خپل کار ځای کې وکتل
د ښار جوړولو او ځمکو سرپرست وزیر محترم محمد جواد پیکار د کلیو بیا رغونې او پراختیا وزیر محترم مجیب الرحمان کریمي سره په خپل کار ځای کې ولیدل او د کوچیانو ژوند ښهوالي په تړاو پر یو لړ پروګرامونو خبرې اترې وکړې.
د دغې کتنې په پیل کې د کلیو بیا رغونې او پراختیا وزیر محترم مجیب الرحمان کریمي یاده کړه چې دغه وزارت د ولسي تړون برنامې له لارې په ټول افغانستان کې په ټولیزه توګه د کوچیانو ۹۰۵ شوراګانې جوړې کړي او یاد وزارت خپلې مرستې د دوی د اړتیاو په نظر کې نیولو سره د دغه شورا ګانو له لارې ترسره کوي.
د کلیو بیارغونې او پراختیا وزیر یاده کړه چې کوچیان د وروستیو بدلونونو په پایله کې په درې ډوله ګرځنده، نیمایي ګرځنده او مېشت وېشل شوي او دغه وزارت د ټولو هغو پروفایلونه جوړ کړي دي.
ورپسې د ښار جوړولو او ځمکو سرپرست وزیر محترم محمد جواد پیکار وویل، کوچیان د افغانستان تابعیت لرونکي په توګه د سرپناه لرلو حق لري، خو د سرپناه جوړولو په ګډون ټول نور خدمتونو باید د یو واضح هوکړهلیک (تفاهمنامه) له لارې تنظیم شي.
محترم محمد جواد پیکار وویل، دغه درې اړخیز هوکړهلیک به د ښار جوړولو او ځمکو وزارت، د کلیو بیا رغونې او پراختیا وزارت او د کوچیانو د چارو انسجام عمومي ریاست ترمنځ لاسلیک شي. د نوموړي په وینا، د دغه هوکړهلیک په رڼا کې به د ښار جوړولو او ځمکو وزارت د کوچیانو مېنو د پلانګذارۍ، د مالکیت حق د تثبیت او رسمي کولو چارې پر مخ یوسې او ورسره د کلیو د بیا رغونې او پراختیا وزارت به بشردوستانه مرستې کوچیانو ته ترسره کړي.
د ښار جوړولو او ځمکو سرپرست وزیر په پای کې د هوکړهلیک چمتو کولو په پار د یوې تخنیکې ډلې د جوړولو لارښوونه وکړه او ترڅنګ یې د کلیو بیا رغونې او پراختیا وزارت څخه وغوښتل چې د ټولو کوچیانو پروفایلونه دې دغه وزارت ته وسپاري، څو خپل ټول فعالیتونو او د اړتیا وړ کړنې د همغه پراساس تنظیم کړي.
