د ښار جوړولو او ځمکو سرپرست وزیر د دایکندي له والي سره ولیدل
د ښار جوړولو او ځمکو سرپرست وزیر محترم محمد جواد پیکار د دایکندي له والي محترم سید انور رحمتي سره په خپل کار ځای کې ولیدل او د یاد ولایت پراختیايي لرلید او د یو شمېر پراختیايي او اقتصادي برنامو تطبیق په اړه خبرې وکړې.
په لومړي سر کې د دایکندي والي محترم سید انور رحمتي دغه ولایت کې د ښار جوړولو او ځمکو وزارت له خوا د پروژو تطبیق او په ځانګړي ډول د تصفیې پلاوي له استولو څخه مننه وکړه او په انکشاف او د ځمکوالۍ او ښاري چارو تنظیم په تړاو یې د دغه وزارت له اساسي ونډې څخه یادونه وکړه.
د دایکندي والي همدارنګه د نیلي ښار او شهرستان ولسوالۍ پر تفصیلي پلانونو د بیا کتنې، د شهیدانو ښارګوټي او د اداري کمپلکس لپاره د تفصیلي پلانونو جوړولو، د ملکیت سندونو وېش چټکتیا او د مالي او بشري سرچینو د زیاتولو په اړه خپل وړاندیزونه وکړل.
ورپسې د ښار جوړولو او ځمکو سرپرست وزیر محترم محمد جواد پیکار په دایکندي کې د پراختیايی او اقتصادي پروژو تطبیق په برخه کې د دغه ولایت د والي له ونډې څخه په مننې زیاته کړه چې دایکندي د ښار جوړولو او ځمکو وزارت په لومړیتوبونو کې دی او تل یې هڅه کړې چې د ځمکوالۍ چارو تنظیم او ښاري پراختیا په برخو کې یې کوټلي ګامونه پورته کړي دي.
د ښار جوړولو او ځمکو سرپرست وزیر په ورته وخت کې د نیلي ښار او شهرستان ولسوالۍ تفصیلي پلانونو تعدیل په تړاو اړوندو برخو ته یې دنده ورکړه چې پر هغو د بیا کتنې ترڅنګ د شهرستان ولسوالۍ سټراټیژیک پلان چمتو کولو لپاره دې هغه ولایت ته یو پلاوی ور ولېږي.
محترم محمد جواد پیکار د ښاري پروګرام جوړونې عمومي ریاست ته لارښوونه وکړه چې ولایت سره په همغږي د شهیدانو ښارګوټي لپاره دې تفصیلي پلان جوړ کړي او د دایکندي له والي څخه یې هم وغوښتل چې خصوصي سکټور سره په ګډه د ښارګوټو جوړولو لپاره دې زمینه برابره کړي.
د ښار جوړولو او ځمکو سرپرست وزیر د دایکندي ښار جوړولو او ځمکو ریاست ته دنده وسپارله چې د غیررسمي ښاري سیمو ثبت پروګرام تر چتر لاندې د ملکیت سندونو وېش لړۍ چټکه کړي. دې سره په خوا کې اړوندو برخو ته سپارښتنه وشوه چې د دایکندي ولایت اداري کمپلکس او د مالي او بشري سرچینو زیاتولو په برخو کې په ۱۳۹۹ کال کې خپل فعالیتونه ګړندۍ کړي.
د کتنې په پای کې دواړو خواوو یو وار بیا د پروژو تطبیق چارو چټکتیا، د همغږۍ کچې لوړولو او د ولس پر ژوند د ګټورو او بنسټیزو فعالیتونو پر ډېرېدو ټینګار وکړ.
