د ښاري چارو مرستیال محترم روښان ولسمل د خوست ولایت د متون قوم له مشرانو سره په کتنه کې د خوست ښار د نوي پراختیايي استراتیژيک پلان په اړه خبرې وکړې
په دې غونډه کې چې د ښاري چارو مرستیال محترم روښان ولسمل په مشرۍ، د خوست ښاروال محترم عبدالبصیر محمد زی، د خوست د ښار جوړولو او ځمکو رئیس محترم ابراهیم الله ولی زی او د خوست ولایت د متون قوم د مشرانو په ګډون جوړه شوه، په سر کې د متون قوم مشرانو د ځمکو او ښاري پراختیا په برخه کې خپلې ستونزې د ښاري چارو له مرستیال سره شریکې کړې.
ورپسې، محترم روښان ولسمل د خوست ښار نوي پراختیایي استراتیژیک پلان په اړه معلومات وړاندې کړل او زیاته یې کړه چې یاد پلان د یوه اوږد مهال لید لوري په توګه ګڼل کیږي چې په تطبیق سره یې د خوست ښار د منظم انکشاف، پراختیايي او ټولګټو پروژو د تطبیق لپاره د زمینې د برابرولو، د خلکو د هوساینې، اقتصادي ودې او پانګونې د جذب لپاره لاره هواره کړي.
محترم روښان ولسمل زیاته کړه چې د ښار جوړولو او ځمکو وزارت په دې وروستیو کې د هرات، خوست، کندهار، مزار شریف او جلال اباد ښارونو لپاره پراختیايي استراتیژیک پلانونه جوړ کړي چې یاد پلانونه له نیکه مرغه د اوبو، اراضۍ او ښاري پراختیا په عالي شورا او په کابینه کې د جلالتمآب جمهور رئیس له لوري منظور شوي دي.
د ښاري چارو مرستیال د خوست ولایت ښار جوړولو او ځمکو رئیس ته لارښوونه وکړه ترڅو د متون قوم د ځمکو د ستونزو په حل کې د ځمکوالۍ چارو تنظیم قانون په رڼا کې اړین اجراات ترسره کړي.
###
