د پنجشیر ولایت د بازارک ښاروالۍ د اداري ودانۍ د دوهم پوړ د رغونې چارې وڅارل شوې
۱۴۴۷/۰۵/۲۶
د پنجشیر ولایت د کور او ښار جوړولو ریاست محترم رئیس، انجنیر فهیم نورزاد وایي چې د دې ریاست اړوند تخنیکي ټیم د بازارک ښاروالۍ د اداري ودانۍ د دوهم پوړ د اعمار له روانو چارو څخه تخنیکي لیدنه او څارنه ترسره کړه.
ښاغلي انجنیر نورزاد وویل، یاده څارنه د بازارک ښاروالۍ د وړاندیز او د ولایت مقام د حکم پر بنسټ ترسره شوه، چې موخه یې د پروژې د کار کیفیت، د انجینري نقشې د تطبیق او د تخنیکي اصولو رعایت یقیني کول دي.
د نوموړي په خبره، په دې څارنه کې د سیخ بندۍ، پوښښ او سلبکاري د چارو معاینه وشوه، او مسؤل انجنیرانو ته لازمې لارښوونې ورکړل شوې څو کارونه د نقشو او تخنیکي اسنادو سره سم پر مخ یوسي.
د کور او ښار جوړولو وزارت د امارتي او ملکي ادارو د ودانیزو پروژو د طرحې، ډیزاین، نظارت او مراقبت مسؤلیت لري. دا وزارت او اړوند ولایتي ریاستونه ژمن دي چې ټول ساختماني کارونه د انجینري معیارونو او ښاري اصولو پر بنسټ ترسره شي، څو د دولتي تاسیساتو کیفیت او دوام تضمین شي.
