د نوي کابل ښار په پروژه کې د رسول مصیر شرکت هم تخنیکي کارونه چټک کړل
۱۴۴۷/۱۱/۰۶
د رسول مصیر ودانیز او سوداګریز شرکت، د نوي کابل ښار د پراختیايي پلان په چوکاټ کې د لومړي فاز د «ج» برخې عملي کارونه په رسمي ډول پر مخ وړي.
د کور او ښار جوړولو وزارت، د نوي کابل ښار د پارختیا محترم ریاست د دغه پارسل له پرمختیایي چارو هم څارنه کوي، څو ټولې چارې د پلان او منل شوې نقشې سره سمې ترسره شي.
دا مهال په پروژه کې د انجنیري سروې د سړکونو د محوري کرښو ټاکنه او د ځمکې د پرې کولو او پوره کولو کارونه په منظم ډول روان دي.
د دغه چارو موخه، د ساحې تخنیکي برابرول او د معیاري سړکونو لپاره بنسټیز شرایط برابرول دي.
تر دې مخکې د ساحې د هوارولو، د خاورې د کمپکشن او د لومړني ډرېناژ مسیرونو د ټاکلو چارې بشپړې شوې دي، څو د اوبو د ایستلو او زیربنایي جوړښتونو لپاره مناسب فني چاپېریال رامنځته شي.
د پلان له مخې، د سړکونو له اصلي جوړښت وروسته به د اوبو رسولو او فاضلاب شبکې کارونه د تخنیکي ټیمونو له لوري پیل شي، چې دا د ښار د اساسي زیربناوو مهمه برخه ګڼل کېږي.
د رسول مصیر شرکت د پروژې امر وایي، ټول کارونه یې د کور او ښار جوړولو وزارت د لارښوونو، ماسټرپلان او منظور شوو انجنیري نقشو له مخې پر مخ وړل کېږي، څو د نړیوالو ښاري معیارونو سره سم یو منظم او پایدار ښاري چاپېریال رامنځته شي.
هغه زیاته کړه، د پروژې په ساحه کې د ځمکې ثبات، د ترافیکي جریان لپاره د سړک عرضي ډیزاین او د خدماتي لاینونو پلانونه هم په تخنیکي توګه په پام کې نیول شوي دي.
د یادونې وړ ده چې شاوخوا (۳۶۰) جریبه ځمکه د رسول مصیر ساختماني او سوداګریز شرکت تر پراختیا لاندې ده، چې په دې برخه کې د بنسټیزو زیربنایي کارونو عملي بهیر پیل شوی او د پلان له مخې به په پړاونو کې پراختیا ومومي.
