د هلمند واشېر ولسوالۍ کې د یوې ودانیزې پروژې له چارو څارنه وشوه
۱۴۴۶/۰۷/۰۷
هلمند ولایت کې د کور او ښار جوړولو ریاست محترم رئیس مولوي شمس الله ناظم وایي، د ریاست اړوند تخنیکي انجنیرانو یې د کندهار - هرات پر عمومي لوې لارې واشېر ولسوالۍ کې د یوې ودانیزې پروژې له چارو څارنه وکړه.
ښاغلی مولوي ناظم وایي، دغه پروژه یو باب مسجد شریف دی چې له کابل تر هرات پر عمومي سړک هر اویا (70) کیلومترۍ کې جوړېږي.
نوموړی وایي، د هملند واشېر ولسوالۍ کې جوړېدونکی مسجد شریف د درې سوو (300) لمونځ کوونکو لپاره دی، چې په دوه برخو وېشل شوی.
یوه برخه یې د (170) نارینه لمونځ کوونکو لپاره او بله هغه یې د (130) ښځینه لمونځ کوونکو لپاره ځانګړې شوې ده.
هغه وایي، د قراردادي شرکت مسؤلینو ته یې لازمې لارښوونې او سپارښتنې وکړې، چې ټولې چارې د نقشې مطابق او په خپل وخت سرته ورسوي.
د یادولو وړ یې بول، چې پر لویو لارو د مسجد شریف جوړولو دغه پروژې د ټولګټو چارو محترم وزارت اړوند دي، خو د کور او ښار جوړولو وزارت یې نقشې ترتیبوي او له چارو یې څارنه کوي.
