د نوي کابل ښار په محمدیه ښارګوټي کې تخنیکي څارنه ترسره شوه
۱۴۴۷/۱۱/۱۹
د کور او ښار جوړولو وزارت، د ښاري سرغړونو او د پروژو پر تطبیق د څار محترم عمومي ریاست اړوند د ښاري سرغړونو د مخنیوي محترم ریاست تخنیکي ټیمونو، د دوامداره نظارتي پروګرامونو په لړ کې، د نوي کابل ښار په محمدیه ښارګوټي کې ساحوي تخنیکي څارنه ترسره کړه.
یاده څارنه د بېلابېلو تخنیکي برخو له لوري په هر اړخیز ډول ترسره شوه، چې پکې د سایټ پلان، استوګنیزو او سوداګریزو برخو، عامه تاسیساتو، سرکونو شبکو، کانالیزاسیون، د ښارګوټي حریم او حدود، برېښنا او فایبر نوري وضعیت شامل وو.
د ساحوي ارزونې پر مهال یو شمېر پلاني سرغړونې تثبیت شوې، چې له هغې ډلې غیرمجاز د پوړونو زیاتوالی، په استوګنیزو ساحو او د سړکونو پر مسیر د دوکانونو جوړول او د عامه تاسیساتو د ساحو د کارونې بدلون شامل دي.
ټاکل شوې ده چې د څارنې له بشپړېدو وروسته به د ښارګوټي د وضعیت مفصل او مستند راپور د کور او ښار جوړولو وزارت مقام ته وړاندې شي، څو لازم تصمیمونه ونیول شي.
همداراز، ټینګار وشو چې د نظارت بهیر به د کاري پلان له مخې په دوامداره توګه پر مخ ولاړ وي او د کابل ښار نور ښارګوټي به هم په منظم ډول تر څارنې لاندې ونیول شي.
د دې ډول نظارتونو موخه د ښاري پلانونو دقیق تطبیق، د غیرمعیاري تراکم مخنیوی، د ساختماني کیفیت لوړول او د ښاري مدیریت پیاوړتیا ده.
