د نوي کابل ښار د لومړي فاز له ودانیزو چارو څارنه وشوه
۱۴۴۵/۱۰/۲۵
د نوي کابل ښار ستره ملي پروژه چې د اوسني کابل ښار بدیل او په (۳۷۰۰۰۰) درې سوه اویا زره جریبه ځمکه کې جوړېږي، عملي چارې یې پیل دي.
یاده پروژه چې د درې میلیون وګړو لپاره ډیزاین شوې، دمګړۍ یې ودانیزې چارې د لومړي فاز په (ب) برخه کې روانې دي.
د کور او ښار جوړولو وزارت د نوي کابل ښار د پراختیا ریاست محترم رئیس انجنیر اقبال میرزاده وایي، مسؤلینو یې په لومړي فاز کې د (ب) برخې له ودانیزو چارو څارنه وکړه، تر څو چارې معیاري او پلان سره سمې پر مخ لاړې شي.
د یاد ریاست مسؤلین وایي، اوسمهال په (ب) برخه کې د ساحوي دفترونو، ځمکې هوارولو، د ځینو برخو ډکولو، د فرعي سړکونو څخه د موانعو لیرې کولو، د سړک په غاړو کې د ګلدان چارې او دغه راز پر دوه بابه تعمیرونو کار روان دی.
د نوي کابل ښار د پراختیا ریاست انجنیري ټیم، د ودانیزو چارو پر مخ بیولو برخه کې د خاور ساختماني شرکت مسؤلینو او کار کوونکو ته لازمې او اړینې لارښوونې کړې دي.
د نوي کابل ښار ماسټر پلان، ډیزاین او تولې نقشې په نړیواله کچه ترتیب شوي او د کور او ښار جوړولو وزارت هوډ لري چې یاد ښار د ماسټر پلان مطابق په نړیوالو معیارونو برابر سرته ورسوي.
