د مالي او اداري مرستیال په مشرۍ د اړوندو ریاستونو ترمنځ ناسته وشوه
۱۴۴۷/۰۲/۱۲
د کور او ښار جوړولو وزارت محترم مالي او اداري مرستیال الحاج محمد ارسلاح خروټي په مشرۍ د دغه معینیت اړوندو ریاستونو له مسؤلینو سره ناسته وشوه.
په دغه ناسته کې، بحث وشو، چې څنګه کېدای شي د ریاستونو ترمنځ د چارو په ترسره کولو کې بشپړه همکاري او همغږي رامنځته شي او چارې له ستونزو پرته ترسره شي.
ښاغلي مرستیال الحاج محمد ارسلاح خروټي وویل، لازمه ده، چې په ډیپو کې شته جنسونه معلوم شي، چې څه شته او څه نشته تر څو یې په چمتو کولو او وېش کې ستونزې ختمې شي.
ښاغلي مالي او اداري مرستیال وویل، ترانسپورت برخه دې هم کیفیت او کمیت په پام کې ونیسي، د موټرو د ترمیم اړتیا او په وخت اقدامات دې لازم وګڼي.
د نوموړي په خبرو کې دا هم وه، چې باید د ځینو تخنیکي ریاستونو لپاره د انجنیرۍ اړوند وسایل او تجهیزات برابر شي، تر څو د هغوی ستونزې حل شي.
محترم خروټي ټینګار وکړ، چې په تدارکاتي او اداري او نورو ټولو برخو کې دې د فساد مخنیوي لپاره تدابیر لا نور هم جدي شي او ټولې هغه لارې چارې دې په پام کې ونیول شي، چې له مخې یې فساد سره کلکه مبارزه کېدای شي.
هغه وویل، د اړتیا وړ توکو په رانیولو کې دې اړوند شرکتونو څخه ژمنه واخیستل شي، په چې په لنډ وخت او ښه کیفیت کې غوښتل شوي توکي وزارت ته تسلیم کړي.
په ناسته کې حاضرو مسؤلینو ومنله چې ټول موارد به په پام کې نیسي او د په ترسره کېدو کې به یې جدي اقدامات کوي.
