د افغانستان ملکیتونه او ځمکې بیې ایښودنې پروګرام

د افغانستان پر ملکیتونو او ځمکو د بيې اېښودنې پروګرام په ۱۳۹۷ کال کې د ځمکو د بيو معلومولو او د دولتي او شخصي ملکیتونو لپاره رامنځته شو.

د دې پروګرام موخې د ځمکې ملي پالیسي پلي کول، د کرايې، ګروۍ او پیر او پلور معاملاتو کې د دولتي او شخصي ملکیتونو او د ځمکې اصلي نرخونو را ټولول، د پالیسیو د تطبیق په برخه کې اقتصادي پلان جوړونه کې معلوماتو ته لاسرسی، د ملکیت او ځمکې په معاملاتو کې د فساد کمښت، د ملي عوایدو ډېرول او د خصوصي سکټور د پانګونې جذبول دي.

د دې پروګرام عملي کار د ۱۳۹۷ لمریز کال په وروستیو کې پیل شوی، چې په ترڅ کې يې تر اوسه د ۲۸۷۰۰ ملکیتونو او ځمکو د خرڅلاو قيمتونه راټول شوي.

له دې راټولو شویو بیلګو څخه لږترلږه ۲۰ زره بیلګې یې د قمیت ګذارۍ او د افغانستان د ملکیتونو په سیستم کې ثبت شوې دي. په بل پړاو کې د علمي ورکشاپونو پر مهال راټول  شوي ارقام تر تحلیل او څېړنې لاندې نیول شوي او وروسته به په انلاین ډول د لاس رسي وړ وي.