د اتمې ناحیې قلعچه خمدان ساحې جامع ښاري مطالعات بشپړ شول
۱۴۴۷/۰۸/۲۱
د ښاري مطالعاتو ریاست د کابل ښار د منظمې پراختیا ستراتیژۍ له مخې، د اتمې ناحیې د قلعچه خمدان ساحې جامع، علمي، تخنیکي او ښاري مطالعات په بریالیتوب سره بشپړ کړل.
دغو مطالعاتو کې د ساحې فزیکي، تخنیکي، زیربنايي، اقتصادي، ټولنیز او چاپېریالي اړخونه و ارزول شول، پایلې ښيي چې ساحه د منظمې، دوامدارې او معیاري ښاري پراختیا لپاره لوړ ظرفیت لري.
قلعچه خمدان د ښار د مهمو شریانونو سره نږدې موقعیت لري، د دولت ملکیت ده او له غیرقانوني ودانیو پاکه ده، چې د پانګونې او ښاري پراختیا لپاره ستراتیژیک فرصت برابروي.
د KUDF د پلان له مخې، ساحه د مختلط متوسط منزل او رهایشي متوسط منزل کاربری لري او د ۲ څخه تر ۲۰ پوړیزو ودانیو د اعمار ظرفیت لري، ساحه د کورونو د اړتیاوو پوره کولو، د نفوس د فشار کمولو، د ځايي اقتصاد د ځواکمنتیا او د کار فرصتونو د پراختیا لپاره مناسبه ده.
ساحه د برېښنا، مخابراتو او فایبر نوري شبکې له نسبي پوښښ برخمنه ده، او وړاندیز شوي سړکونه یې د احمد شاه بابا سړک سره نښلوي.
راپور څرګندوي چې د ساحې قانونمند، منظم او دوامدارې پراختیا لپاره د حقوقي وضاحت، د پلان مطابق پراختیا، د زیربناوو پراختیا، چاپېریالي مدیریت او د ټولنې فعال مشارکت ته اړتیا ده.
دغه مطالعات د ښاري پراختیا د ستراتیژیکو پریکړو لپاره بنسټیزه سرچینه او د ښار د منظم، خوندي او معیاري پراختیا په موخه مهم لارښود ګڼل کېږي.
