محترم محمد جواد پیکار د خیرخواه مارکېټ دوکاندارانو او سوداګرو سره ولیدل
په دې کتنه کې چې د ښار جوړولو او ځمکو وزارت د غونډو په تالار کې وشوه، په لومړي سر کې د خیرخواه مارکېټ دوکاندارانو او سوداګرو د کار موقتي اجازې ترلاسه کولو، د دغه مارکېټ په ساحه کې د امنیتي پوستې لېرې کولو او د نورو ستونزو دایمي حل په تړاو د ښار جوړولو او ځمکو وزارت د مرستې غوښتنه وکړه.
وروسته د ښار جوړولو او ځمکو سرپرست وزیر محترم محمد جواد پیکار په کابل کې د خیرخواه مارکېټ دوکاندارانو او سوداګرو سره د اوښتي اقتصادي زیانونو له امله د خواخوږي په څرګندولو سره زیاته کړه چې د ښار جوړولو او ځمکو وزارت د ستونزو په هواري کې له هېڅ راز هڅو څخه ډډه نه کوي.
د ښار جوړولو او ځمکو سرپرست وزیر وویل، د خیرخواه مارکېټ دوکاندارانو او سوداګرو د شته ستونزو دایمي حل لپاره پلان دا دی چې په لنډ وخت کې د خیرخواه مارکېټ او یا د پلازمېنې په کومه بله سیمه کې په معیارونو برابر سوداګریز کمپلکس جوړ کړي چې دې سره به د هر راز احتمالي خطرونو مخه ونیول شي.
په دې توګه د کار د موقت جواز ورکړې او همدا راز امنیتي پوستې لېرې کولو په اړه د خصوصي سازۍ عمومي ریاست ته لارښوونه وشوه چې دوکاندارانو او سوداګرو سره په پوره همغږي د اړتیا وړ سندونو سره مل یو وړاندیز جوړ کړي او د جمهوري ریاست عالي مقام ته د منظوري لپاره ور واستوي.
دې سره په خوا کې د خصوصي سازۍ عمومي ریاست ته دنده واخیسته چې د دولتي ځمکو او املاکو کړنلارې په رڼا کې د خیرخواه مارکېټ استازیو سره په همغږي له یاد مارکېټ څخه د موقتې ګټنې په پار یو قرارداد چمتو او د هغه پر بنسټ عملي کارونه ترسره شي.
په پای کې د ښار جوړولو او ځمکو سرپرست وزیر یو وار بیا د خیرخواه مارکېټ زیانمنو دوکاندارانو او سوداګرو ته ډاډ ورکړ چې د هغو ستونزو حل لپاره په قاطع ډول رسېدهګي کوي.
