په کندهار کې د جامع عمر مسجد شریف ودانیزې چارې به ډیر ژر بشپړې شي
۱۴۴۸/۶/۱۰
د کور او ښار جوړولو محترم وزیر الحاج مولوي نجیبالله حیات حقاني د کندهار ښار د حضرت عمر (رض) جامع جومات د ځینو برخو د جوړولو او پاتې ساختماني چارو د بهیر څارنه او ارزونه وکړه.
د یادې پروژې چارې د روان کال په ترڅ کې د عالیقدر امیرالمؤمنین شیخ القرآن والحدیث مولوي هبة الله اخندزاده حفظه الله د لارښوونې پر بنسټ پیل شوې وې، چې تر دې مهاله د پام وړ پرمختګ پکې شوی او ټاکل شوې ده پاتې چارې یې هم په نږدې راتلونکي کې بشپړې شي.
محترم وزیر د پروژې د لیدنې پر مهال مسؤلینو ته لارښوونه وکړه، چې ساختماني چارې په چټکۍ، د لوړ کیفیت او ټاکل شویو معیارونو سره سم پر مخ یوسي، څو پروژه په نږدې وخت کې بشپړه او ګټې اخیستنې ته وسپارل شي.
اوس مهال د مدرسې د خونو او کتابتون په برخو کې د خښتو ایښودلو، پلسترکارۍ، بېلوونکو دېوالونو جوړولو او کانکریټ اچولو چارې روانې دي.
همدارنګه، د جومات د ګنبد د پلسترکارۍ او نصبولو، د لېفټ د ځای کیندنې، کانکریټ اچولو او ایزوګام، د څښاک اوبو څاه کیندلو، د اوبو زېرمتون جوړولو او نل لیکو غځولو، او د لمریزې برېښنا د سیسټم نصبولو چارې هم په بېلابېلو برخو کې روانې دي.
د یادونې وړ ده، چې د حضرت عمر (رض) جامع جومات د ودانیزې پروژې په بېلابېلو برخو کې چارې د ټاکل شوي پلان له مخې په هم مهاله توګه پر مخ وړل کېږي او هڅې روانې دي، چې پاتې ساختماني چارې یې په ټاکلي وخت او د ښه کیفیت په لرلو بشپړې شي.
