د صنایع سبز صنعتي ښارګوټي هغه پانګوال چې پر خپلو ځمکو فابریکې نه جوړوي، قراردادونه به یې فسخه شي
۱۴۴۸/۴/۲۹
د کور او ښار جوړولو وزارت محترم وزیر الحاج مولوي نجیبالله حیات حقاني په خپل کاري دفتر کې د نوي کابل ښار اړوند د صنایع سبز صنعتي ښارګوټي له یو شمېر پانګوالو سره وکتل او د یاد ښارګوټي د پانګونې، صنعتي فعالیتونو او شته ستونزو په اړه یې خبرې وکړې.
د کور او ښار جوړولو وزارت محترم وزیر د ناستې پر مهال وویل، چې د اسلامي امارت مشران ټول هېوادوال او پانګوال د خپلې کورنۍ غړي ګڼي او د هغوی د ستونزو د حل او چارو د سمون لپاره په پوره صداقت او امانتدارۍ کار کوي.
نوموړي زیاته کړه، چې په تېرو ادارو کې د رامنځته شویو ستونزو له امله د صنایع سبز صنعتي ښارګوټي په ځینو برخو کې هم ستونزې موجودې وې، خو د دغو ستونزو د حل لپاره لازم اقدامات شوي او اوس په یاد ښارګوټي کې د پام وړ پانګونه روانه ده.
ښاغلي حقاني د هغو پانګوالو په اړه، چې پخوا یې په یاد صنعتي ښارګوټي کې ځمکې ترلاسه کړې، خو تر اوسه یې پر ځمکو صنعتي فعالیتونه نه دي پیل کړي او یا یې د قراردادونو له مخې پاتې قسطونه نه دي تحویل کړي، ټینګار وکړ، چې د خپلو تعهداتو عملي کولو ته باید جدي پاملرنه وکړي.
نوموړي څرګنده کړه، چې که یاد پانګوال خپل پاتې قسطونه تحویل نه کړي او پر ترلاسه شویو ځمکو د قراردادونو له شرایطو سره سمې فابریکې جوړې نه کړي، قراردادونه به یې فسخه او ځمکې به نورو پانګوالو ته ورکړل شي.
د نوموړي په وینا، د دې پرېکړې موخه د صنعتي ځمکو اغېزمنه ګټه اخیستنه، د پانګونې د بهیر چټکتیا او د تولیدي فعالیتونو پراختیا ده.
ورپسې، پانګوالو خپلې څرګندونې وکړې، د کور او ښار جوړولو وزارت د محترم وزیر له دریځ څخه یې ملاتړ څرګند کړ او د خدماتو د ښه والي، د اصلاح شوي پلان د جوړېدو او عملي کېدو په برخه کې یې د وزارت له هڅو مننه وکړه.
پانګوالو همداراز د صنایع سبز صنعتي ښارګوټي د لا ښه پرمختګ او د صنعتي فعالیتونو د پراختیا په موخه د برېښنا د برابرولو، د سړکونو د جوړولو او یو شمېر نورو خدماتي ستونزو یادونه وکړه او د حل غوښتنه یې وکړه.
د ناستې په پای کې د صنایع سبز صنعتي ښارګوټي د ستونزو د حل، د پانګوالو د تعهداتو د عملي کېدو او د صنعتي فعالیتونو د پیاوړتیا موضوعات د بحث اساسي محورونه وو.
