د بغلان ولایت په مرکزي ولسوالۍ کې د سولې ښارګوټي د توپوګرافۍ سروې پیل شوه
۱۴۴۷/۲/۱۷
د کور او ښار جوړولو وزارت د سروې او جياېس ریاست تخنیکي ټیم د بغلان ولایت د بغلان مرکزي ولسوالۍ اړوند د مصلحت تپې په سیمه کې د سولې ښارګوټي د توپوګرافۍ سروې چارې پیل کړې.
یاده سروې د سیمې د دقیقې مساحت معلومولو، د ځمکې د طبیعي وضعیت ارزونې او د ښارګوټي د پلان جوړونې لپاره د اړینو تخنیکي معلوماتو د راټولولو په موخه ترسره کېږي.
د دغې سروې له بشپړېدو وروسته به د ترلاسه شویو معلوماتو پر بنسټ د سولې ښارګوټي تفصیلي پلان ترتیب شي، ترڅو د ښاري پراختیا چارې د معیاري اصولو او تخنیکي معیارونو له مخې پرمخ ولاړې شي.
د کور او ښار جوړولو وزارت هڅه کوي چې د سروې او پلان جوړولو له لارې د هېواد په بېلابېلو ولایتونو کې د منظمې ښاري پراختیا، معیاري ښارګوټو جوړولو او دوامدارې ښاري ودې لپاره لازم بنسټونه برابر کړي.
