د کابل ښار د پل محمودخان په سیمه کې د ۱۴ پوړه مختلط استوګنیزې پروژې تخنیکي څارنه وشوه
۱۴۴۸/۱/۲۹
د کور او ښار جوړولو وزارت د ښاري تخلفاتو د مخنیوي او د پروژو د تطبیق د څارنې محترم عمومي ریاست اړوند د ښاري سرغړونو د څارنې ریاست تخنیکي ټیم له لوري، د کابل ښار د ۱۶مې ناحیې اړوند پل محمودخان سیمه کې د ملي پراختیا شرکت د ۱۴ پوړیزې مختلطې استوګنیزې ودانۍ له روانو ساختماني چارو څارنه ترسره شوه.
یاده څارنه د وزارت د مقام د لارښوونې او د منظم نظارتي پلان له مخې ترسره شوې، چې پر مهال یې د پروژې له مسؤلینو سره د وزارت د نافذه اصولو، مقرراتو او طرزالعملونو د رعایت په اړه لازمې لارښوونې او معلومات شریک شول.
تخنیکي ټیم د پروژې مسؤلینو ته سپارښتنه وکړه، چې ساختماني چارې د کور او ښار جوړولو وزارت له اصولو او مقرراتو سره سمې عیارې کړي، په ځانګړې توګه د ودانیزو نقشو د تأیید (ویزې) په برخه کې لازم قانوني اقدامات ترسره کړي.
د څارنې پر مهال د پروژې د وضعیت په اړه مستند تخنیکي راپور هم برابر شو، چې د لا زیاتو ارزونو او اړینو پرېکړو لپاره به د وزارت مقام ته وړاندې شي.
د کور او ښار جوړولو وزارت د ښاري نظم د ټینګښت، د غیرمعیاري ودانیزو چارو د مخنیوي، د تفصیلي پلانونو د ساتنې او د ودانیزو چارو د کیفیت د لوړولو په موخه د کابل ښار په بېلابېلو سیمو کې د ساختماني پروژو دوامداره څارنه ترسره کوي.
