د کور او ښار جوړولو د وزیر په مشرۍ په ننګرهار کې د اسکان دایمي ولایتي کمېټې ناسته ترسره شوه
۱۴۴۷/۱۱/١٧
د کور او ښار جوړولو وزارت د محترم وزیر الحاج مولوي نجیبالله حیات حقاني په مشرۍ د ننګرهار ولایت د اسکان دایمي ولایتي کمېټې ناسته ترسره شوه.
په دې ناسته کې د ننګرهار محترم والي مولوي محمد نعیم اخوند ، د کډوالو چارو، ښار جوړولو، کرنې، عدلیې او نورو اړوندو ادارو مسؤلینو ګډون کړی و.
د غونډې اساسي موخه دا وه چې د راستنېدونکو مهاجرینو لپاره د ځمکو د وېش بهیر چټک، شفاف او منظم شي، څو مستحقو کسانو ته په عادلانه ډول د استوګنې زمینه برابره شي.
په ناسته کې د ځمکو د تثبیت، سروې، د مستحقینو د پېژندنې، او د وېش د بهیر د مدیریت پر میکانېزمونو تفصیلي بحث وشو. همداراز ټینګار وشو چې ټولې چارې دې د واضح طرزالعملونو له مخې، له هر ډول ځنډ ، او د عامه باور د جلب په موخه پر مخ یووړل شي.
محترم وزیر الحاج مولوي نجیب الله حیات حقاني د اړوندو ادارو ترمنځ د همغږۍ پر پیاوړتیا ټینګار وکړ او زیاته یې کړه چې د مهاجرینو د اسکان موضوع یو لومړیتوب دی، چې باید په ګډه او مسؤلانه توګه عملي شي.
د اسکان دایمي ولایتي کمېټې د دې لپاره جوړې شوې دي چې د راستنېدونکو کډوالو د اسکان چارې منظمې، همغږې او چټکې کړي. دغه کمېټې په مرکز او ولایتونو کې د بېلابېلو ادارو ترمنځ د همغږۍ له لارې هڅه کوي څو د ځمکو د وېش، زیربناوو برابرولو او خدماتو وړاندې کولو بهیر معیاري او شفاف پر مخ ولاړ شي
