ډېر ژر به د ودانیزو موادو د کیفیت خوندیتوب ازموینې په موخه د لابراتوار د جوړولو چارې پیل شي
۱۴۴۷/۱۱/۰۹
د کور او ښار جوړولو وزارت له لوري، د ودانیزو موادو د کیفیت خوندیتوب په موخه د معیاري ارزونې د یو عصري لابراتوار د جوړولو چارې به په لنډو ورځو کې پیل شي.
د یاد لابراتوار لپاره ځمکه د نوي کابل ښار په ساحه کې ځانګړې شوې، چې د پروژې د عملي پیل په لړ کې یې د خط اچولو چارې هم ترسره شوې.
ټاکل شوې ده، چې دا لابراتوار به د ودانیزو موادو د کیفیت د دقیقې ازموینې، د تخنیکي معیارونو د تطبیق د څارنې او د غیرمعیاري موادو د کارونې د مخنیوي په برخه کې مهم رول ولوبوي.
دا پروژه د ښاري پراختیا د معیاري کېدو، د ودانیزو چارو د کیفیت د لوړولو او د ملي ساختماني سکتور د پیاوړتیا په موخه پیل شوې، چې په بشپړېدو سره به یې د هېواد په کچه د ساختماني پروژو د کیفیت د کنټرول لپاره یو مهم بنسټ رامنځته شي.
یاد لابراتوار د کور او ښار جوړولو وزارت له مهمو بنسټیزو پروژو څخه شمېرل کېږي، چې د ښاري پلانونو د سم تطبیق او د معیاري ودانیزو چارو د تأمین په برخه کې به اغېزناک رول ولري.
