د شنې فضا برابرولو پر لور پراخ ګام؛ په الشیخ ښارګوټي کې زرګونه زینتي نیالګي کېنول شول
۱۴۴۷/۱۱/۰۴
د کور او ښار جوړولو وزارت، د نوي کابل ښار د پراختیا محترم ریاست، د شنې فضاء رامنځته کولو او چاپېریال ښکلا په موخه، په «الشیخ» ښارګوټي کې زرګونه زینتي نیالګي کېنول.
د نوي کابل ښار د پراختیا محترم رئیس مولوي محمد بلال محمدي وایي، تازه یې په الشیخ ښارګوټي کې د شنې فضا د پراختیا او د سالم چاپېریال د رامنځته کولو په پار عملي ګامونه پورته کړي دي.
دغه نیالګي د ښارګوټي په بېلابېلو برخو کې د منظم پلان له مخې کېنول شوي، څو د اوسېدونکو لپاره یو پاک، زرغون او د اوسېدو وړ چاپېریال برابر شي.
له (۳۵۰۰) څخه زیات زینتي نیالګي د کورنیو سرچینو، په ځانګړي ډول د همدې ښارګوټي له قوریو او شنو خونو څخه برابر شوي او په ټاکلو ساحو کې کېنول شوي دي.
همدارنګه شاوخوا (۲۵۰۰) نور نیالګي د الشیخ ښارګوټي د صنعتي پارکونو په محدوده کې کېنول شوي، چې د صنعتي سیمو د زرغونولو برخه هم پیاوړې کوي.
د نوي کابل ښار د پراختیا ریاست د بنسټیزو پروژو ترڅنګ د چاپېریال ساتنې او د سالم ژوند د فضا رامنځته کولو ته ځانګړې پاملرنه لري او په همدې موخه د نیالګیو کېنولو پروګرامونه په دوامداره توګه عملي کوي.
باور دا دی چې د نیالګیو کېنول نه یوازې د اکسیجن په تولید او د هوا د کیفیت په ښهوالي کې مهم رول لري، بلکې د چاپېریالي ککړتیا په مخنیوي، او د ښار د طبیعي ښکلا په زیاتوالي کې هم اغېزناک تمامېږي.
