د راستنېدونکو مهاجرینو لپاره د ځمکو د وېش لړۍ دوام لري
۱۴۴۷/۸/۱۹
د کور او ښار جوړولو وزارت په مشرۍ د دایمي مېشتېدنې کمېټې د تېرې اوونۍ په ترڅ کې د باعزته او دایمي مېشتېدو په موخه په یو شمېر ولایتونو کې راستانه شوو مهاجرو کورنیو ته د ځمکو د نمرو د وېش بهیر د منظور شوي تفصیلي پلان له مخې په منظم ډول ترسره کړ.
په دغه لړ کې، په کونړ ولایت کې (۱۵۵) راستانه شوو مهاجرو کورنیو ته د ځمکو نمرې وېشل شوې دي، چې په دې سره په یاد ولایت کې د وېشل شویو نمرو شمېر تر دې مهاله (۵۰۶) کورنیو ته پورته شو.
دغه راز، په ننګرهار ولایت کې (۵۷۰) راستانه شوو مهاجرو کورنیو ته د ځمکو وېش بشپړ شو چې مجموعاً تر دې دمه (۱۲۰۳) کورنیو ته د ځمکو نمرې سپارل شوې دي.
په ورته مهال، کندز ولایت کې (۱۰۹) راستانه شوو کورنیو ته د تفصیلي پلان له مخې د ځمکو وېش ترسره شو، چې په دې سره د یاد ولایت ټولیز شمېر (۹۲۰) کورنیو ته ورسېد.
سربېره پر دې، په زابل ولایت کې هم (۶۱) راستانه شوو مهاجرو کورنیو ته د ځمکو نمرې د ټاکلي پلان مطابق ووېشل شوې.
په ټوله کې، د همدې تېرې اوونۍ په ترڅ کې (۸۹۵)راستانه شوو مهاجرو کورنیو ته د ځمکو وېش ترسره شو او په عمومي ډول تر دې مهاله په بېلابېلو ولایتونو کې (۶۴۳۷) مهاجرو کورنیو ته د دایمي مېشتېدو په موخه د ځمکو نمرې سپارل شوې دي.
د کور او ښار جوړولو وزارت، هڅې پیل کړي چې د ولسونو د هوساینې لپاره د ارام ژوند زمینه برابره کړي او په دغه برخه کې اړوند هر اړخیز خدمات وړاندې کړي.
