په لوګر کې د مهاجرینو په ښارګوټي کې د سړکونو د هوارولو او جغل اچونې له چارو څارنه وشوه
۱۴۴۸/۲/۲۹
د لوګر ولایت د کډوالو او بېرته راستنېدونکو په وېشل شوي ښارګوټي کې د عمومي او فرعي سړکونو د هوارولو او جغل اچونې چارې په منظم ډول دوام لري.
د لوګر ولایت د کور او ښار جوړولو ریاست اړوند انجینري ټیم په سیمه کې د سړکونو د هوارولو او جغل اچونې له روانو چارو څخه تخنیکي څارنه وکړه، ترڅو چارې د ټاکل شویو تخنیکي معیارونو له مخې ترسره شي.
د یاد ښارګوټي د عمومي او فرعي سړکونو د هوارولو او جغل اچونې پر چارو شاوخوا دوه میلیونه افغانۍ لګښت راځي، چې د کور او ښار جوړولو وزارت له اړوندې بودیجې څخه ورکول کېږي.
د دغو چارو په بشپړېدو سره به د ښارګوټي د اوسېدونکو لپاره د تګ راتګ اسانتیاوې رامنځته او د سیمې د ښاري بنسټونو د لا پیاوړتیا زمینه برابره شي.
