په کابل ښار کې د استوګنیزو او سوداګریزو پروژو د پانګونې پر څرنګوالي خبرې وشوې
۱۴۴۷/۰۷/۲۳
د کور او ښار جوړولو وزارت د پانګونې د چارو د تنظیم ریاست په کابل ښار کې د یوې استوګنیزې او سوداګریزې پروژې د پانګونې د غوښتنې د ارزونې په موخه، د رمبو اسکای سوداګریز او ساختماني شرکت له مسئولینو سره ناسته ترسره کړه.
په دې ناسته کې د یاد شرکت استازو د خپل کاري مخینې، تخنیکي وړتیاوو او مالي ځواک په اړه هر اړخیز معلومات وړاندې کړل او څرګنده یې کړه، چې دغه شرکت په تېرو کلونو کې د هېواد دننه او بهر ګڼې پروژې په بریالیتوب سره پلې کړې دي.
د شرکت مسئولینو همداراز ډاډ ورکړ، چې د یادې استوګنیزې او سوداګریزې پروژې تخنیکي طرحه او د پانګونې پلان به د کو راو ښار جوړولو وزارت د پانګونې د چارو د تنظیم ریاست ته وسپاري، تر څو له تخنیکي او اصولي پلوه وڅېړل شي.
د ناستې په دوام کې به د کو راو ښار جوړولو وزارت د پانګونې د چارو د تنظیم ریاست مسئولینو، د یاد وزارت له لوري د پانګونې لپاره ټاکل شوي معیارونه او اصول تشریح کړل.
هغوی ټینګار وکړ، چې دایمي مالي وړتیا، مناسب تخنیکي ظرفیت او مسلکي بشري ځواک د استوګنیزو او سوداګریزو پروژو د بریالۍ پلي کېدو له بنسټیزو شرطونو څخه ګڼل کېږي.
د کو راو ښار جوړولو وزارت د ښاري پراختیا په برخه کې له معیاري او روڼو پانګونو ملاتړ کوي او هڅه کوي، چې د خصوصي سکتور د پانګونې له لارې د اقتصادي ودې، د کاري فرصتونو رامنځته کېدو او د ښاري بنسټونو د پراختیا لپاره زمینه برابره کړي.
