د ترینکوټ ښار په ناحیو کې د ښاري تخلفاتو د مخنیوي په موخه نظارت ترسره شو
۱۴۴۷/۰۷/۰۸
د ارزګان ولایت د کور او ښار جوړولو ریاست د تخلفاتي ټیم له لوري د ترینکوټ ښار د ټولو ناحیو څخه نظارت ترسره شو.
یاد نظارت د کور او ښار جوړولو وزارت د ښاري سرغړونو د مخنیوي د عمومي ریاست په لارښوونه ترسره شو، چې موخه یې د ښاري تخلفاتو مخنیوی، ارزونه او د ښاري پلانونو د تطبیق ډاډ ترلاسه کول وو.
د نظارت پر مهال ښاریانو ته لارښوونه وشوه چې خپل تاسیسات د ښاري پلانونو او د کور او ښار جوړولو وزارت د محترم مقام د طرزالعمل مطابق ترسره کړي.
همدارنګه هغو اشخاصو ته چې غوښتل یې په استوګنیزو نمرو کې سوداګریز دوکانونه جوړ کړي، عامه پوهاوی ورکړل شو چې دا ډول کړنې تخلف بلل کېږي او ټینګار وشو چې په استوګنیزو نمرو کې باید یوازې استوګنیز کورونه جوړ شي.
سربېره پر دې، د ښار اوسېدونکو ته د ښاري پلانونو اړوند معلومات وړاندې شول او د پلان مطابق شنې ساحې، استوګنیزې ساحې او سوداګریزې ساحې ورته په نښه او ور وپېژندل شوې.
د ارزګان ولایت د کور او ښار جوړولو ریاست د ښاري نظم د ټینګښت، د ناقانونه تاسیساتو د مخنیوي او د ښاري پلانونو د معیاري تطبیق په موخه د ښار په بېلابېلو ناحیو کې دوامدار نظارتونه ترسره کوي. دا چارې د ښاري سرغړونو د کمښت، عامه پوهاوي د لوړولو او منظم ښاري پراختیا لپاره بنسټیز اهمیت لري.
