په باریکاب کې د دېوال جوړولو چارې موقتآ ودرول شوې
۱۴۴۷/۶/۱
د کور او ښار جوړولو وزارت د ښاري سرغړونو د مخنیوي ریاست د رئیس انجنیر احمد جاهد شهاب لیوال په لارښوونه د دغه ریاست تخنیکي او د عامه پوهاوي ګډ ټیم د باریکاب صنعتي کرنیز پارک شمالي دېوال ساحې ته ولاړ.
ښاغلي انجنیرلیوال وویل، پلاوی د دېوال د روان کار وضعیت له نږدې وڅېړه او مسؤلینو ته یې د وزارت رسمي پیغام ورساوه چې د موضوع تر وروستي وضاحت او پرېکړې وړاندې باید کار موقتآ ودرول شي، مسؤلینو ته څرګنده شوه چې د چارو دوام د دولتي سرچینو د ضایع کېدو او د ځايي خلکو د شکایتونو د زیاتېدو لامل کېدای شي.
دنوموړي په خبره، ټیم په ساحه کې د ښاري اصولو، پخوانیو فیصله لیکونو او د مقرراتو د مراعت اهمیت روښانه کړ او ټینګار یې وکړ چې تر نهایي حکم مخکې هر ډول کار باید درول شوی وي.
د باریکاب صنعتي ـ کرنیز پارک په ملي کچه مهم اقتصادي ارزښت لري، نو وزارت هڅه کوي چې ټولې چارې یې د قانون، دقیقو تخنیکي اصولو او شفافیت پر بنسټ ترسره شي.
